O le faauōga e faavae i le alofa. O le tele o lou aʻoaʻoina e faatatau ia Ieova, o le a faateleina ai foʻi la lou alofa mo ia. A o tupu aʻe lou alofa mo le Atua, o le a tupu aʻe ai foʻi ma lou naunau e auauna ia te ia. O le a uunaia oe e lenei mea e avea ai o se soo o Iesu Keriso. (Mataio 28:19) E ala i le auai faatasi i le aiga fiafia o Molimau a Ieova, e mafai ai ona e mauaina le faauōga a le Atua e faavavau. O le ā e ao ona e faia?

E ao ona e faaalia atu lou alofa mo le Atua e ala i le usitaʻia o ana tulafono. “O lenei lava le alofa i le Atua, ia tatou tausi i ana poloaiga; e le mamafa foi ana poloaiga.”​—1 Ioane 5:3.

Ia faatatau mea o e aʻoaʻoina. Na faamatala e Iesu se tala e faataʻitaʻia ai lenei mea. Na fausia e se tagata poto lona fale i luga o le papa. O le tagata valea na ia fausia lona fale i luga o le oneone. Ina ua to mai uaga ma matagi, sa lē paʻū le fale lea na fausia i luga o le papa, ae na paʻū le fale lea na fausia i luga o le oneone ma matuā malepe ai. Na fetalai Iesu faapea o i latou o ē faalogo i ana aʻoaʻoga ma faia, e faatusaina i latou i le tagata poto o lē na fau lona fale i luga o le papa. Ae o i latou o ē e faalogo i ana aʻoaʻoga ma lē faia, ua faatusaina i le tagata valea o lē na fau lona fale i luga o le oneone. E te fia faapei o lē fea tagata?​—Mataio 7:24-27.

 Tuuina atu. O le uiga o lenei mea o lou faalatalata atu lea ia Ieova e ala i le tatalo ma taʻu atu ia te ia e te manaʻo e faia lona finagalo e faavavau. O le faia o le finagalo o le Atua e faaalia ai o oe o se soo o Iesu Keriso.​—Mataio 11:29.

Papatisoga. “Ia papatisoina oe, ma ia fufulueseina au agasala i lou valaau i le suafa o le Alii.”​—Galuega 22:16.

Ia matuā aafia atoatoa i le auauna atu i le Atua. “O mea uma lava tou te faia, ia faia ma le loto, peiseai ua faia i le Alii [Ieova], a e le o tagata.”​—Kolose 3:23.