E lē mananaʻo Satani ma ana temoni e te auauna atu i le Atua. E latou te mananaʻo e faaliliuese tagata uma mai le Atua pe afai latou te mafaia. E faapefea ona latou taumafai e faia lenei mea? O se tasi o auala e ala mai i lotu sesē. (2 Korinito 11:13-15) E sesē se lotu pe afai e lē aʻoaʻoina e lea lotu le upu moni mai le Tusi Paia. O le lotu sesē e pei o se tupe pepelo​—atonu e ono foliga mai o se tupe moni, ae e lē aogā. E mafai ona faapogaia ai faalavelave e tele ia te oe.

O pepelo faalelotu e lē taitai lava mafai ona faafiafiaina ai Ieova, le Atua o le upu moni. A o iai Iesu i le lalolagi, sa iai se vaega faalelotu o ē na mananaʻo e fasioti ia te ia. Na latou manatu o la latou auala o tapuaʻi ai o le auala saʻo lea. Na latou faapea mai: “E tasi lo matou Tamā, o le Atua lea.” Pe na ioe i ai Iesu? E leai! Na ia fetalai atu ia i latou: “O outou nai lo outou tamā le tiapolo.” (Ioane 8:41, 44) I aso nei, e toʻatele tagata latou te manatu o loo latou tapuaʻi i le Atua, ae o loo latou auauna moni lava ia Satani ma ana temoni!​—1 Korinito 10:20.

 E pei lava ona fuaina mai e se laau leaga fua leaga, e fuaina mai foʻi e le lotu sesē tagata o ē faia mea leaga. Ua tumu le lalolagi i faalavelave talu ai mea leaga o loo faia e tagata. O loo iai amioga lē tatau faaleituaiga, fetauaʻiga, gaoi, pulega sauā, fasioti tagata, ma le toso faamalosi. O le toʻatele o latou faia nei mea o loo iai a latou lava lotu, ae ua lē uunaia i latou e a latou lotu e faia le mea lelei. E lē mafai ona avea i latou ma uō a le Atua seʻiloga e taofia lo latou faia o mea leaga.​—Mataio 7:17, 18.

Ua aʻoaʻo e lotu sesē tagata e tatalo atu i tupua. Ua fetalai mai le Atua e aua le tatalo atu i tupua. E talafeagai lenei mea. Pe e te fiafia pe a lē talanoa atu se tasi ia te oe ae na ona talanoa atu i lou lava ata? Pe e mafai ona avea lena tagata ma au uō moni? E leai, e lē mafai. E finagalo Ieova e talanoa atu tagata ia te ia, e lē i se faatusa po o se ata, lea e leai se ola.​—Esoto 20:4, 5.

E aʻoaʻoina e lotu sesē e faapea e lē āfaina le fasiotia o isi i taimi o taua. Na fetalai Iesu faapea o uō a le Atua o le a iai ia i latou le fealofani. Tatou te lē fasiotia tagata tatou te alolofa i ai. (Ioane 13:35) E sesē foʻi mo i tatou le fasiotia o tagata leaga. Ina ua ō atu fili o Iesu e puʻe mai ia te ia, sa ia lē faatagaina ona soo e tau ina ia puipuia ai o ia.​—Mataio 26:51, 52.

E aʻoaʻo e lotu sesē faapea o le a faapuapuagatia tagata amioleaga i le afi i seoli. Peitaʻi, ua aʻoaʻo mai le Tusi Paia e faapea o le agasala e oo atu ai i le oti. (Roma 6:23) O Ieova o le Atua o le alofa. Pe o le a faapuapuagatiaina ea e se Atua alofa tagata e faavavau? O le mea moni e leai! I le Parataiso, o le a na o le tasi lava le lotu, le lotu lea e faamaonia e Ieova. (Faaaliga 15:4) O lotu uma lava e faavae aʻe i pepelo a Satani o le a mavae atu.