E mafai ona e aʻoaʻoina e uiga ia Ieova e ala i le faitauina o le Tusi Paia. I aso ua leva, na filifilia ai e le Atua ni tagata patino ia tusia i lalo ona manatu. O na tusitusiga ua taʻua o le Tusi Paia. I aso nei, tatou te aʻoaʻoina e uiga i le Atua e ala i le faitauina o le Tusi Paia. Talu ai o loo iai i le Tusi Paia afioga, po o le feʻau, a Ieova, ua taʻua foʻi la o le Afioga a le Atua. E mafai ona tatou talitonu i mea o fai mai ai le Tusi Paia auā e lē taitai pepelo Ieova. ‘E le mafai ona pepelo le Atua.’ (Eperu 6:18) O loo iai i le Afioga a le Atua le upu moni.​—Ioane 17:17.

O le Tusi Paia o se tasi o meaalofa tautele a le Atua ia i tatou. E pei o se tusi mai se tamā alofa i lana fanau. Ua taʻuina mai ai ia i tatou le folafolaga a le Atua e uiga i le suia o le lalolagi e avea o se nofoaga matagofie e ola ai​—o se parataiso. Ua taʻu mai e le Tusi Paia ia i tatou mea sa faia e le Atua i taimi ua mavae, mea o loo ia faia nei, ma mea o le a ia faia i le lumanaʻi mo lana fanau faamaoni. Ua fesoasoani foʻi ia i tatou ina ia foʻia o tatou faafitauli ma ia mauaina le fiafia.​—2 Timoteo 3:16, 17.

 O Molimau a Ieova o uō a le Atua; o le a latou fesoasoani ia te oe e malamalama i mea o aʻoaʻoina e le Tusi Paia. Tau lava o lou faailoa atu ia i latou e te manaʻo e suʻesuʻeina le Tusi Paia. Latou te lē tāpāina ni tupe mo le faia o lenei mea. (Mataio 10:8) E faaopoopo atu i ai, e mafai ona e auai i sauniga faa-Kerisiano. O loo faia nei sauniga i nofoaga e tapuaʻi ai e taʻua o Maota o le Malo. Pe afai e te auai i sauniga faa-Kerisiano, o le a vave ona tuputupu aʻe lou poto e uiga i le Atua.

E mafai ona e aʻoaʻoina e uiga i le Atua mai mea ua ia faia. Mo se faaaʻoaʻoga, ua faapea mai le Tusi Paia: “Na faia e le Atua le lagi ma le lalolagi.” (Kenese 1:1) Ina ua foafoaina e Ieova “le lagi,” sa ia faia le lā. O le ā e taʻu mai e lena mea ia i tatou e uiga i le Atua? Ua taʻu mai ai ia i tatou o loo ia Ieova le tele o le mana. E na o ia lava e mafai ona faia se mea e malosi tele e pei o le lā. Ua taʻu mai ai foʻi ia i tatou e faapea e atamai Ieova, talu ai e manaʻomia le atamai e fai ai le lā, lea o loo faapea ona aumai ai le vevela ma le malamalama ma e lē taitai lava uma.

Ua faaalia mai le foafoaga a Ieova e alofa o ia ia i tatou. Mafaufau i ituaiga eseese o fualaau taumafa mata uma o loo iai i le lalolagi. Sa ono mafai e Ieova ona saunia mai na o le tasi le ituaiga o fualaau taumafa mata mo i tatou​—po o le matuā leai lava ma se mea. Na i lo le faia o lea, ua foaʻiina mai e Ieova ia i tatou le tele o ituaiga o fualaau taumafa mata ma e anoanoaʻi le eseese o foliga, le lapopoa, lanu, ma tofo. Ua faaalia e lenei mea e faapea o Ieova o le Atua e lē gata ina alofa ae tele foʻi le aao mafola ma magafagafa ma agalelei.​—Salamo 104:24.