Ina ia avea ma uō a le Atua, e manaʻomia ona e aʻoaʻoina e uiga ia te ia. Pe e iloa e au uō lou igoa ma latou faaaogāina? Latou te faia faapena. E finagalo le Atua ina ia e iloaina lona suafa ma faaaogāina foʻi. O le suafa o le Atua o Ieova. (Salamo 83:18; Mataio 6:9) E tatau foʻi ona e aʻoaʻoina mea na te fiafia i ai ma mea e lē fiafia i ai. E manaʻomia ona e iloa po o ai ana uō ma o ai foʻi ona fili. E tele le taimi e faaaluina ina ia iloa lelei ai se tasi. Ua faapea mai le Tusi Paia o se mea atamai le faatulaga ese o se taimi ina ia aʻoaʻoina ai e uiga ia Ieova.​—Efeso 5:15, 16.

E faia e uō a le Atua mea e fiafia i ai o ia. Mafaufau i au uō. Afai e leaga le auala o e feagai ai ma i latou ma faia mea latou te ʻinoʻino i ai, pe o le a faaauau ona avea i latou ma au uō? E mautinoa lava e leai! I se tulaga tutusa afai e te manaʻo e avea oe ma uō a le Atua, e manaʻomia ona e faia le mea e fiafia i ai o ia.​—Ioane 4:24.

E lē o lotu uma e taʻitaʻiina atu ai i se faauōga ma le Atua. Na fetalai Iesu, le uō aupito vāvālalata a le Atua, i ni ala se lua. O le tasi ala e vatele ma o loo faatumulia i tagata. O lena ala e tau atu i le faaumatiaga. O le isi ala e vaapiapi ma e toʻaitiiti tagata o loo ui ai. O lena ala e tau i le ola e faavavau. O le uiga o lenei mea, afai e te manaʻo e mauaina le faauōga ma le Atua, e ao ona e aʻoaʻoina le ala saʻo e tapuaʻi atu ai ia te ia.​—Mataio 7:13, 14.