O le oti o le tuufaafeagai lea o le ola. O le oti e tai pei o se moe ua gase. (Ioane 11:11-14) E lē mafai e ē o feoti ona faalogo, vaai, tautala, po o le mafaufau i se mea. (Failauga 9:​5, 10) Ua aʻoaʻo e tapuaʻiga sesē faapea e alu atu lē ua oti i se nofoaga o agaga ina ia mau faatasi ai ma o latou tuaa. E lē o le mea lena o aʻoaʻo mai e le Tusi Paia.

O i latou ua feoti e lē mafai ona latou fesoasoani ia i tatou, ma e lē mafai ona latou faaleagaina i tatou. O se mea ua masani ai tagata le faia o tū faaletapuaʻiga ma faaleaganuu, ma taulaga lea e latou te talitonu o le a faamalieina ai ē ua feoti. E lē fiafia le Atua i lenei mea ona e faavae aʻe i se tasi o pepelo a Satani. E lē mafai foʻi ona faamalieina ai ē ua feoti, talu ai e leai se ola o ia i latou. E lē tatau ona tatou matataʻu pe tapuaʻi i ē ua feoti. E tatau ona tatou tapuaʻi atu tau lava o le Atua.​—Mataio 4:10.

O le a toe ola mai ē ua feoti. O le a fafagu mai e Ieova ē ua feoti i le ola i se lalolagi parataiso. O lena taimi o loo tuu mai i le lumanaʻi. (Ioane 5:28, 29; Galuega 24:15) E mafai e le Atua ona toe fafagu mai i latou o feoti e pei foʻi ona mautinoa le mafai ona e fafaguina se tagata mai le moe.​—Mareko 5:22, 23, 41, 42.

O le manatu faapea tatou te lē feoti, o se pepelo ua faasalalauina e Satani le Tiapolo. Ua faapogaia e Satani ma ana temoni tagata ina ia manatu faapea o agaga o ē ua feoti, o loo ola ma faapogaia maʻi ma isi faalavelave. E olegia e Satani tagata, i nisi taimi e ala mai i miti ma vaaiga. E taʻusalaina e Ieova i latou o ē taumafai e talanoa atu i ē ua feoti.​—Teuteronome 18:10-12.