O le a lē pei le Parataiso o le lalolagi o loo tatou ola ai nei. E leʻi finagalo lava le Atua e faatumulia le lalolagi i faalavelave ma faanoanoaga, tigā ma puapuaga. I le lumanaʻi, o le a faia e le Atua le lalolagi ma parataiso. O le a faapeī tulaga e iai le Parataiso? Seʻi o tatou suʻe i faamatalaga o fai mai ai le Tusi Paia:

Tagata lelei. O le a avea le Parataiso ma aiga o uō a le Atua. O le a faia mea lelei e le tasi mo le isi. O le a latou ola e tusa ai ma ala amiotonu a le Atua.​—Faataoto 2:21.

Tele meaʻai. O le a lē toe iai se fia ʻai i le Parataiso. Ua faapea mai le Tusi Paia: “O le a tele saito [po o, meaʻai] i le lalolagi.”​—Salamo 72:16, NW.

Fale lelei ma galuega e faamalieina ai. I le lalolagi Parataiso, o aiga taʻitasi uma lava o le a tofu i latou ma o latou lava fale. O le a faia e tagata uma galuega e maua ai le fiafiaga moni.​—Isaia 65:21-23.

 Filemu i le lalolagi aoao. O le a lē toe fetauaʻi ma feoti tagata i taua. Ua faapea mai le Afioga a le Atua: “Ua faaiua e [le Atua] o taua.”​—Salamo 46:8, 9.

Soifua mālōlōina lelei. Ua folafola mai e le Tusi Paia e faapea: “E le fai mai foi se tasi ua mau ai [i le Parataiso], Ou te maʻi.” (Isaia 33:24) E lē gata i lea, e leai se tasi e toe pipili pe tauaso pe tutuli pe lē mafai ona tautala.​—Isaia 35:5, 6.

Se iʻuga i tigā, faanoanoa, ma le oti. Ua faapea mai le Afioga a le Atua: “E leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.”​—Faaaliga 21:4.

O le a lē toe iai ni tagata leaga. Ua folafola mai e Ieova e faapea: “E vavaeeseina o e amio leaga ai le laueleele, e liaiina ai foi o e amio pepelo.”​—Faataoto 2:22.

O tagata o le a alolofa ma faaaloalo le tasi i le isi. O le a lē toe iai ni faiga lē tonu, pulega sauā, matapeʻapeʻa, ma le feʻainaʻi. O le a autasia tagata ma ola e ōgatusa ma ala amiotonu a le Atua.​—Isaia 26:9.