O le a lē faatagaina e Ieova tagata leaga e faafanoina le Parataiso. E na o ana uō o le a ola ai iinā. O le ā o le a tupu i tagata leaga? Ina ia aʻoaʻoina po o le ā le tali, seʻi manatu i le tala moni ia Noa. Na ola Noa i le faitauafe o tausaga ua mavae. Na avea o ia ma tagata lelei o lē sa taumafai malosi i taimi uma e faia le finagalo o Ieova. Ae o isi tagata i le lalolagi sa latou faia mea leaga. O lea na fetalai atu ai Ieova ia Noa e faapea, o le a Ia faaooina mai se lolo e faaumatia ai na tagata amioleaga uma lava. Na ia fetalai atu ia Noa e fau se vaa ina ia lē oti ai o ia ma lona aiga pe a oo mai le Lolo.​—Kenese 6:9-18.

Na fauina e Noa ma lona aiga le vaa. Na lapataʻia e Noa tagata e faapea e oo mai le Lolo, ae sa lē faalogo atu tagata ia te ia. Na faaauau pea ona latou faia mea leaga. Ina ua uma ona fauina le vaa, na ave ai e Noa manu i totonu o le vaa, ma na ulu atu foʻi o ia ma lona aiga i totonu. Ona aumaia loa lea e Ieova o uaga ma matagi tetele. Na timu mo le 40 ao ma le 40 po. Na lofia e le vai le lalolagi atoa.​—Kenese 7:7-12.

 Na faaumatia ola o tagata amioleaga, ae na faasaoina Noa ma lona aiga. Na laveaʻiina ma le saogalemu i latou e Ieova mai le Lolo agaʻi atu i totonu o se lalolagi ua faamamāina mai le amioleaga. (Kenese 7:22, 23) Ua faapea mai le Tusi Paia e toe oo mai foʻi le taimi o le a faaumatia ai e Ieova i latou o ē e mumusu e faia le mea tonu. O le a lē faaumatiaina tagata lelei. O le a latou ola e faavavau i le lalolagi Parataiso.​—2 Peteru 2:5, 6, 9.

I aso nei e anoanoaʻi tagata o loo faia mea leaga. O loo tumu le lalolagi i faalavelave. Ua auina atu pea lava pea e Ieova ana Molimau ina ia lapataʻia tagata, peitaʻi e toʻatele e lē mananaʻo e faalogo i afioga a Ieova. Latou te lē mananaʻo e suia o latou ala. Latou te lē mananaʻo e talia mea o fetalai i ai le Atua e faatatau i mea e tonu ma mea e sesē. O le ā o le a tupu i nei tagata? Pe o le a iai ea se aso e suia ai i latou? O le toʻatele o le a lē taitai lava suia. O le a oo mai le taimi e faaumatia ai tagata amioleaga ma o le a latou lē toe ola lava.​—Salamo 92:7.

O le a lē faaumatiaina le lalolagi; o le a faia ina ia avea o se parataiso. O i latou e avea ma uō a le Atua o le a ola e faavavau i le Parataiso i le lalolagi.​—Salamo 37:29.