O mea leaga o loo tutupu nei i le lalolagi e faaalia ai faapea ua lata mai le Parataiso. Ua faapea mai le Tusi Paia o le a tatou vaaia taimi sili ona mataʻutia a o leʻi oo mai le Parataiso. O loo tatou ola nei i na taimi! O nisi nei o mea ua faapea mai le Tusi Paia o le a tutupu:

Taua tetele. “E sii le taua e le tasi nuu i le tasi nuu, ma le tasi malo i le tasi malo.” (Mataio 24:7) Ua taunuu moni lenei valoaga. Talu mai le tausaga e 1914, ua tutupu ai ni taua se lua a le lalolagi ma le tele o isi taua laiti. E faitau miliona tagata ua maliliu i na taua.

Faateleina faamaʻi. O le a iai ‘faamaʻi i lea mea ma lea mea.’ (Luka 21:11) Po ua taunuu moni lenei mea? Ioe. O le kanesa, faamaʻi o le fatu, fatafata vaivai, fiva malalia, AIDS, ma isi faamaʻi ua fasiotia ai le faitau miliona o tagata.

Lē lava o meaʻai. I le lalolagi aoao o loo iai tagata e lē o lava meaʻai e taumamafa ai. E faitau miliona tagata e maliliu i le fia ʻaai i tausaga uma lava. O se tasi lenei o faailoga e faapea ai ua lē toe umi ae oo mai loa le Parataiso. Ua faapea mai le Tusi Paia: “E i ai foi oge.”​—Mareko 13:8.

 O mafuiʻe. ‘E i ai mafuie i lea mea ma lea mea.’ (Mataio 24:7) Ua taunuu foʻi lenei tulaga i o tatou taimi. Ua silia ma le miliona tagata ua maliliu i mafuiʻe talu mai le 1914.

Tagata amioleaga. O le a avea tagata ma “e mananao i tupe” ma “e alolofa i latou ia i latou.” O le a avea foʻi i latou ma ‘e mananao i mea faafiafia a e leai se manao i le Atua.’ O tamaiti o le a “le faalogo i mātua.” (2 Timoteo 3:1-5) Pe e te lē ioe ea o loo toʻatele tagata faapena i aso nei? E leai so latou āva i le Atua, ma latou te faapogaia faalavelave mo i latou o ē taumafai e aʻoaʻoina e faatatau i le Atua.

Solitulafono. O le a iai foʻi le “tupu tele o le amio leaga.” (Mataio 24:12) Atonu o le a e ioe e faapea ua sili atu ona leaga le solitulafono i taimi nei na i lo tausaga ua teʻa. I so o se vaipanoa lava ua lamatia ai tagata mai le gaoia o a latou mea, faia i ai faiga lē faamaoni, po o le faamanuʻaina foʻi o i latou.

O nei mea uma ua faaalia ai ua latalata mai le Malo o le Atua. Ua faapea mai le Tusi Paia: “Pe a iloa e outou ia mea ua faia, ia outou iloa ua latalata le malo o le Atua.” (Luka 21:31) O le ā le Malo o le Atua? O le pulega faalelagi a le Atua o le a faapea ona faaooina mai le Parataiso i lenei lalolagi. O le a suia e le Malo o le Atua faiga malo faaletagata.​—Tanielu 2:44.