Iā Fepuari 13, 2019, na faasaʻoloto ai Bahram Hemdemov, o lē ua 55 tausaga le matua mai i le falepuipui i Turkmenistan i le māeʻa ai o lona faasalaga e fā tausaga i le falepuipui o Seydi (LB-E/12). Ua toe faatasi nei o ia ma lana avā o Gulzira ma lana fanau e toʻafā. Na taofia ia Hemdemov iā Mati 14, 2015, ona o le faia o se sauniga faalelotu i lona fale i le itumalo o Turkmenabad, ma na molia o ia e le Faamasinoga Faaitulagi a Lebap iā Me 19, 2015. I se fua faatatau, e faatolu i le tausaga ona faamagalo e le faigāmalo a Turkmenistan ia pagota mai i le falepuipui a o iai Hemdemov, ae e leʻi aofia ai o ia i ē na faasaʻoloto e ui sa faasaʻoloto ai nisi o pagota fasioti tagata. Iā Aokuso 15, 2016, na ave ai se tagi a Hemdemov i le UN Human Rights Committee (CCPR), ma o loo faatalitali pea i se tali. O loo iai pea le toʻasefulu tasi o Molimau a Ieova i le falepuipui i Turkmenistan, ona o lo latou teena o le faia o auaunaga faavaegāʻau e ui i faaiʻuga e sefulu mai i le CCPR e faasaga agaʻi i le malo, ona o le sauāina ma le faafalepuipuiina o Molimau talavou ona o lo latou solitū e tusa ai ma o latou lotofuatiaifo.