Iā Aokuso 12, 2022, na faamāeʻa ai le puʻeina o le vaega amata o le Vaega 1 o le vitiō O le Tala i le Faiva a Iesu. Ina ua mavae sina taimi na taofia ai le galuega, na puʻeina loa le vaega e sosoo ai, ma le faamoemoe e faamāeʻa i se vaitaimi o Oketopa 2022.

E pei ona taʻua i le lipoti talu ai, na amata ona puʻeina le vitiō O le Tala i le Faiva a Iesu iā Me 20, 2022, e faaaogā ai totonu o le fale. O le taimi lenā o loo tālia le faamaoniga faaiʻu mo le faaaogāina o le fale mo galuega a le ʻau puʻe vitiō, faapea le vaega o loo iai fausaga anamua. Na maua lea faamaoniga iā Iulai 15, 2022, ma mafai ai loa e le Matagaluega mo Faugāfale a le Lālā a Australasia, ona tuuina atu fale ma vaega e faaaogā mo le puʻeina o vitiō i le Vaega o Vitiō mo le Itulagi (RVT). Ua mafai nei ona faaaogāina fale ma le vaega o loo iai fausaga anamua, mo le puʻeina o vitiō.

E silia i le 500 tagata tauofo mai Ausetalia ma Niu Sila, na faia se sao i le fausiaina o le vaega o loo iai fausaga anamua. O le telē o lenei vaega e silia ma le 7,000 mita faatafafā (75,347 futu faatafafā), ma na fausia ina ia pei lava o fale ma fausaga mai anamua. Na faapea mai le uso o Russell Grygorcewicz, o le sooupu o le Komiti mo Faugāfale, e faatatau i lenei galuega: “E ui e tele luʻi na matou fesagaʻia, ae na matou vaaia le tele o faamaoniga o le fesoasoani a Ieova. E mautinoa o le agaga paia o Ieova ua mafai ai ona faataunuuina lenei galuega.”

Na iai le uso o Ronald Curzan, o se fesoasoani i le Komiti Tauaʻoaʻoga, i le tele o le taimi na faagasolo ai le puʻeina o le vaega amata o le vitiō. Na ia faapea mai: “E ese le matagofie o le galulue faatasi ma uiga faaleuō o ē na tauofo mo galuega faufale, ma le aiga Peteli. E ese le manaia foʻi o le vaai atu ua faaaogā vaega e puʻe ai vitiō, pe a mafaufau i le tele o tausaga na tapena ma fausia ai na vaega. Na matuā faalaeiauina i matou i le tele o le lagolagosua a uso ma tuafāfine o loo iai i le oganuu a le lālā. E mautinoa o le a fesoasoani lenei vitiō e 18 ona vaega e faatatau i le olaga ma aʻoaʻoga a Iesu, ina ia pāʻia ai loto o tagata i le lalolagi aoao.”

Sa iai foʻi le uso o Kenneth Cook, o le sui o le Vaega Pule, i aso faaiʻu o le puʻeina o le Vaega 1 o le vitiō, ma na ia faapea mai: “E mautinoa o loo fesoasoani mai lo tatou Tamā alofa o Ieova i lenei galuega. E tatou te faafetai iā Ieova, o i latou uma na fausiaina vaega e puʻe ai vitiō, ma ē o loo puʻeina nei vitiō, mo a latou faataulaga ma galuega mamafa. E matou te faamoemoe o le a fesoasoani lenei vitiō faapitoa i le toʻatele, ina ia mulimulituʻi ai i tulaga aao o Iesu ma atili vavalalata atu ai iā Ieova.”