Iā Novema ma Tesema i le 2021, na tuuina mai ai e le Komiti o Aiā Tatau a Malo Aufaatasi (CCPR) ni faaiʻuga se lua, lea na lagolagoina ai aiā tatau a Molimau a Ieova e faailoa atu ai o latou talitonuga. O na faaiʻuga na aafia ai ni tuafāfine se toʻalua i Azerbaijan na puʻea e leoleo, a o la talaʻi atu le feʻau o le Tusi Paia.

Iā Novema 5, 2021, na lagolagoina ai e le CCPR aiā tatau a tuafāfine o Matanat Gurbanova ma Saadat Muradhasilova e talaʻi atu ai. Na puʻea nei tuafāfine iā Novema 2014, ina ua maua e leoleo se lipoti mai i se tasi e lē māiloa po o ai. Na sala tupe i laʻua i le 1,500 tupe Azerbaijani ($880 tālā Amerika) a le tagata e toʻatasi. Na faapea mai le CCPR o le puʻea o nei tuafāfine e lē tusa ai ma le tulafono, ma na faatonuina le Faamasinoga a Azerbaijan ina ia faia gaoioiga talafeagai e ʻalofia ai le toe tupu o se mea faapea i se taimi o i luma.

O Matanat ma Saadat o se ʻauso, ma na la faapea mai: “E ui na taumafai leoleo ma le faamasino e faafefe i maʻua, ae o le mea na tupu ua atili ai ona malosi lo ma faatuatua. Ua toe faamaonia mai ai e Ieova, e leai se mea e mafai ona taofia o ia, ma e na te silafia le taimi ma le auala e puipui ai ana auauna.”

E faapena foʻi le mea na tupu iā Tesema 21, 2021. Na tuuina mai ai le faaiʻuga a le CCPR, ua solia e leoleo i Azerbaijan le tulafono ina ua latou puʻea tuafāfine o Jeyran Azizova ma Gulnaz Israfilova, ona o le “faia o galuega faalotu i fafo atu o le vaipanoa o loo la nonofo ai.” I lenā faaiʻuga, na faamaonia mai ai e le CCPR o le gaoioiga na faia e o tatou tuafāfine, e lē o se solitulafono.

Iā Novema 2016, na asia ai e Jeyran ma Gulnaz a la uō i le vaipanoa o Goranboy i Azerbaijan, ma faailoa atu i ai le feʻau mai i le Tusi Paia. Na lipotia i laʻua e se tagata maualuga o le malo, ma na ave ai e leoleo. A o faia le la faamasinoga, na molia ai i laʻua e se faamasino o ni sipai ma sala tupe ai i le 2,000 tupe Azerbaijani ($1,176 tālā Amerika). Na lagolagoina e le faamasinoga o apili lenā faaiʻuga. O lea, na ave ai e tuafāfine le la mataupu i le CCPR.

O faaiʻuga faafaamasinoga e puipuia ai a tatou aiā tatau, e tatou te maua ai le saʻolotoga e talaʻi ai. E tatou te olioli faatasi ma o tatou tuafāfine, o ē ua avea o ni faaaʻoaʻoga mataʻina o le talaʻia o le tala lelei ma le lototetele.—Mataio 10:18.