I le Aso Sa, Oketopa 29, 2023, na pā ai ni pomu i se tauaofiaga itumalo na faia i Kerala i Initia. E faanoanoa ona ua maliliu se uso ma ni tuafāfine se toʻalua, e ese mai i tagata e toʻatolu na maliliu e pei ona lipotia muamua mai. E aofia ai i ē ua fano le soifua le tinā ma le tuagane o le teineitiiti e 12 tausaga lea na maliu. E toʻa 11 uso ma tuafāfine o loo faataotolia pea i le falemaʻi.

Na faatulaga e le lālā i Initia se sauniga faapitoa iā Novema 4, 2023, ina ia saunia ai faamāfanafanaga ma faalaeiauga mo i latou na aafia i le faalavelave. Na valaaulia i lenā sauniga uso ma tuafāfine mai i faapotopotoga e 21 ia na tofia i le tauaofiaga na aafia i pomu. Na faia le sauniga i se Maota mo Sauniga i lenā vaipanoa, ma na toetoe 200 i latou na auai. Na auai le toʻa 1,300 i le polokalame e ala i le Initaneti, ma na puʻeina foʻi le polokalame atoa e maimoa ai ē na faataotolia i le falemaʻi. Na iloiloina e se toeaina mai i le ofisa o le lālā le Salamo 23:1, ma faamatilatila ai le naunau alofa o Ieova i ana auauna taʻitoʻatasi. Na ia faapea mai: “I lenei mau, e lē o fai mai le faisalamo o Ieova o se leoleo mamoe, pe faapea mai o Ieova o se leoleo mamoe lelei. Ae na fai mai le faisalamo o Ieova o ʻloʻu leoleo mamoe.’ O se matuā faamāfanafanaga le iloa e naunau moni Ieova iā i tatou taʻitoʻatasi.”

Na taʻua e se uso na iai i le taimi o le faalavelave e faigatā ona moe i pō. E ui i lea, na ia tauofo e fesoasoani i ē o loo taofia pea i le falemaʻi. Na ia taʻua: “O le mātauina o le latou faatuatua ma le saʻo o le latou vaai, ua fesoasoani e faagalo ai oʻu mafatiaga. Na latou usuina ma le olioli pese o le Malo, e ui i o latou tigā ma manuʻa.” Na faapea mai se isi uso: “Atonu e umi se taimi faatoʻā toe foʻi nei uso ma tuafāfine pele i a latou faasologa masani. E mautinoa o le a faaauau ona faaalia e le ʻauuso le alofa iā i latou. Ou te talitonu o loo tausia i latou taʻitoʻatasi e le aao malosi o lo tatou Atua alofa. Ua matuā faalaeiauina ai lava aʻu.”

Talu ai o i tatou o se aiga autasi i le lalolagi aoao, e faamāfanafanaina i tatou i le iloa e faaauau ona “faamālōlō” e Ieova ʻē ua lotomomomo ma fusifusia manuʻa’ o o tatou uso ma tuafāfine pele i Initia.—Salamo 147:3.