ROMA​—I le Aso Faraile, Novema 24, 2017, na faapotopoto ai i le Iunivesite o Padua, o se tasi o iunivesite ua leva i Italia, i latou e iai tomai faafomaʻi, o bioethics, ma i latou e iai tomai i tulafono, mo le fonotaga na faamatuaina “The Refusal of Blood Transfusion by Adult Patients: What Are the Treatment Options?—Blood Save 2017.” O lenei fonotaga na faatupeina e le sili atu ma le 25 sosaiete faasaienisi ma faalapotopotoga, faapea foʻi ma le Matagaluega o le Soifua Mālōlōina a Italia.

E masani lava ona vaai i tuigātoto e lē afāina, ma e na o le pau lenā o le togafitiga faafomaʻi e mafai ona faasaoina ai le soifua o se tagata maʻi o loo feagai ma se maʻi po o se taotoga faigatā. O lenei manatu na teena e le toʻatele o sui na faia lauga i le fonotaga. Na faamatala mai e se tasi o tagata tomai na asiasi ane i le fonotaga, o Dr. Luca P. Weltert, o se fomaʻi e iai le tomai faapitoa i le faia o taotoga o le fatu, māmā, ma isi totoga i le fatafata i le European Hospital i Roma, e faapea: “Ua tatou molimauina i le asō e ono iai ni aafiaga leaga o tuigātoto, ma e i le tele o tulaga, e lē manaʻomia.”

Na faia e Dr. Weltert ma isi fomaʻi lenei faaiʻuga e fua i le auala na latou feutagaʻi ai o ni fomaʻi, ma i latou e mamaʻi, faapea foʻi faamaoniga mai suʻesuʻega a saienitisi e faamaonia ai, e iai le fesootaʻiga o tuigātoto ma le faatupulaʻia o le fuainumera o ē maliliu, o ē mamaʻi, o le umi e taofia ai se maʻi i le falemaʻi, ma isi lamatiaga ogaoga i le soifua mālōlōina o ē o loo taliaina tuigātoto. *

O na faamaoniga mai suʻesuʻega a saienitisi, faatasi ai ma le taugatā o le tau o tuigātoto, na uunaʻia ai le Faalapotopotoga a le Soifua Mālōlōina i le Lalolagi (WHO) i le 2010, e tilofaʻia le faaaogāina o auala e tausia ma pulea ai le faaaogāina o le toto (PBM)—o le ituaiga o tausiga faafomaʻi lea e galulue faatasi ai matātā eseese faafomaʻi, ina ia saunia le tausiga e fua i manaʻoga o le tagata maʻi i le tele e mafai ai, ia taulaʻi i le soifua mālōlōina ma le saogalemu o le maʻi, o le faaleleia atili o le malosi i le māeʻa ai o se taotoga, ma matuā faaitiitia ai le faaaogāina o tuigātoto. Na faia e le WHO se iʻugāfono e uunaʻia ai atunuu e 193 o sui auai o Malo Aufaatasi, ina ia faatino loa le faaaogāina o le PBM.

Na umi se taimi na talanoaina ai e le Polofesa o Stefania Vaglio, o le faauluuluga i le vaega o vailaau i le Sant’Andrea University Hospital, i Roma, le auala fou e vaai ai tagata uma o loo i le auaunaga faafomaʻi i le faaaogāina o le PBM, i lona faapea mai, o le taimi muamua, sa faalagolago le tausiga faafomaʻi i le auala e teuina ma faaaogā ai toto na tauofo mai e isi tagata, ae i le taimi nei, “ua suia atoatoa le mea e taulaʻi i ai mai le toto na tauofo mai, i le toto o le tagata maʻi lava ia.” O se tasi o sini o le PBM “o le faaitiitia lea o le toto e alu e ala i le ave o le faatāua i le tagata maʻi lea e faia lona taotoga, . . . ia taulaʻi atoatoa ma faia tulaga uma e mafai ina ia sefe ai le toto o le tagata maʻi.” Na faamanino atili mai e le Polofesa o Vaglio, o auala faafomaʻi e sefe ai le toto o se tagata maʻi, “o lona uiga moni, o togafitiga e sili atu ona lelei.”

Na faamautinoa mai e Dr. Tommaso Campagnaro, o se fomaʻi e tomai i le faia o so o se taotoga i le Verona University Hospital aogā e maua pe a faaaogā togafitiga e ʻalofia ai tuigātoto. I le māeʻa ai o se iloiloga o faamatalaga e amata mai i le taufaaiʻuiʻuga o le 1990 e faatatau i maʻi na faia ni taotoga e sili ona lavelave o o latou manava, na ia faaiʻu mai ai e faapea: “O maʻi e leʻi taliaina ni tuigātoto, na itiiti ni faafitauli na latou fesagaʻia ma laʻitiiti le numera o i latou na maliliu, e faatusatusa iā i latou na talia tuigātoto.”

Na faailoa i le lautele e Dr. Campagnaro ma isi na faia lauga i le fonotaga, lo latou agaga faafetai i Molimau a Ieova i le fesoasoani e uunaʻia fomaʻi ia faia nisi togafitiga e suia ai tuigātoto. Na taʻua faapea e Anna Aprile, o le polofesa lagolago mo tulafono faafomaʻi i le Iunivesite o Padua: “Matou te faafetaia Molimau a Ieova, ona o lo latou lāgā o le mataupu i le aiā e teena ai tuigātoto, ua fesoasoani ai i tagata uma e mafaufau i lenei mataupu ma mafai ai ona fesagaʻia le luʻi o le lē lava o le toto.”

O failauga o le fonotaga e aofia ai i latou e iai tomai faapitoa eseese faafomaʻi e pei o ē gafa ma le faaaogāina ma le tuiina o vai moe, o fomaʻi o le fatu, o fomaʻi o gasegase tau tamaʻitaʻi, o ē e iai le tomai faatatau i le toto, o fomaʻi i gasegase tau kanesa, ma i latou e iai le tomai i le togafitia o ponaivi. Peitaʻi, e tasi lava le latou feʻau tāua: o faapotopotoga ma faalapotopotoga faafomaʻi, o ē faia tulafono, ma tagata lautele, e tatau ona maua le avanoa i auala e faaaogā ai le PBM, pe a fua i le faatupulaʻia o faamatalaga ua lomia ma tala o mea na tutupu mai ē atamamai i le auaunaga faafomaʻi.

Na faaopoopo mai Dr. Welterts: “O le toe faaleleia o le alātoto autū o se tagata i taotoga faaonapōnei, e vaai i ai o se taotoga e sili ona telē e mafai ona fai i le tino o se tagata. . . . Afai [o lenei taotoga] e mafai ona faia e aunoa ma se tuigātoto, o lona uiga la e mafai lava ona faia so o se taotoga.”