Iā Me 12, 2023, na faia ai e le Faamasinoga o Apili a Kenya se faaiʻuga tāua, e puipuia ai saʻolotoga o tapuaʻiga a tamaiti aʻoga i Kenya. Ua leva ona iai le tulafono a Kenya, e lē faatagaina ai le faamalosia o so o se tasi e faia se gaoioiga e feteenaʻi ma ona talitonuga faalelotu. Peitaʻi, talu mai le 2015, e toʻa 41 tamaiti aʻoga Molimau a Ieova na tutuli pe faamālōlō mai i le aʻoga ona o le lē faia o sa latou vaega i gaoioiga faalelotu a le aʻoga.

O lenei faaiʻuga mai i le Faamasinoga o Apili, e fesootaʻi atu i se mea na tupu i le 2017. Na teena ma le faaaloalo e ni tamaiti aʻoga Molimau se toʻaiva, le auai i gaoioiga faalelotu a le aʻoga. O lo latou faia faapea, na ave ai le mataupu i le faamasinoga. I le 2019, na maua ai le faaiʻuga mai i se faamasinoga maulalo e faapea, e lē o aafia aiā tatau a tamaiti Molimau i le faamalosia o i latou e le aʻoga e auai i gaoioiga faalelotu. Ae iā Me 12, 2023, na taʻua ai e le Faamasinoga o Apili a Kenya, o le faaiʻuga a lenā faamasinoga “ua aveesea ai le aiā tatau a se tamaitiiti e aʻoga ai ma lana aiā e faaaloalogia ai o ia.” Ua taʻua atili e le Faamasinoga o Apili, o le faamalosia o Molimau a Ieova e auai i gaoioiga faalelotu “o se faiga faailoga tagata, e solitulafono ma e lē faavaea.” Na faapea mai se tasi o faamasino na iai i le faamasinoga: “O le faaiʻuga a lenei Faamasinoga, e tatau ona avea ma taʻiala mo aʻoga, e tusa ai ma aiā tatau faalelotu a fanau aʻoga.”

O lenei faaiʻuga, e lagolagoina ai se faatonuga na faia iā Mati 2022 e le Matagaluega o Aʻoga a Kenya, lea na poloaʻia ai faauluuluga o aʻoga uma, ina ia faaaloalogia aiā faalelotu a tamaiti aʻoga. O lenā faaiʻuga, ua faaopoopo atu ai foʻi Kenya i le tele o atunuu o Aferika e pei o Malawi ma Rwanda, o ē ua faia tulafono e puipuia ai aiā tatau a tamaiti aʻoga Molimau.

Tau ina ia mautinoa e a tatou fanau lototetele i Kenya ma le lalolagi aoao, e mitamita Ieova iā i latou, pe a latou tutū atu mo le tapuaʻiga mamā!—Faataoto 29:25.