Iā Oketopa 9, 2022, na tatalaina ai le toe teuteuga O le Tusi Paia—O le Faaliliuga a le Lalolagi Fou i le faa-Samoa. O le uso o Geoffrey Jackson o se sui o le Vaega Pule na tatalaina le Tusi Paia i sana lauga na puʻeina, ma na maimoa i ai tagata talaʻi a Molimau a Ieova mai i Amerika Samoa, Ausetalia, Niu Sila ma Samoa. Ina ua uma le lauga, na tufatufaina atu loa kopi o le Tusi Paia ua lomia, ma na mafai foʻi ona maua i luga o masini faaonapōnei.

Na amata le talaʻiga a Molimau a Ieova i Samoa i le 1931, ae na faavaeina la latou uluaʻi faapotopotoga i Apia i le 1953. Na muamua tatalaina le Faaliliuga a le Lalolagi Fou i le faa-Samoa i le 2009. Na talia fiafia e Molimau a Ieova ma isi tagata lautele, lenei faaliliuga e saʻo aʻiaʻi ma faigofie ona maua.

I lenei faaliliuga ua toe teuteuina, na faia ai e le ʻaufaaliliu ni taumafaiga faapitoa ina ia faaaogā le gagana e faigofie ona malamalama i ai, ae i le taimi e tasi ia saʻo aʻiaʻi. Na faapea mai se tasi o le ʻaufaaliliu: “E matuā faatāua e tagata Samoa le Tusi Paia. O lea, e ui na faaaogā e le ʻaufaaliliu upu ma faaupuga faigofie, ae na faaeteete foʻi ina ia faatumauina pea le mamalu o le gagana e faaaogā. O le fesoasoani a Ieova ua tatou maua ai i le faa-Samoa le Tusi Paia atoa ua toe teuteuina, lea o le a tatou maua uma ai aogā.”

E matou te talitonu o le a fesoasoani atili lenei faaliliuga i tagata o le a faitau i ai, ina ia iloa le tāua o manatu o Ieova le Atua ma latou maua ai aogā.—Salamo 139:17.