E lua faaiʻuga o le vaiaso na faasilasila ai e Molimau a Ieova le tatalaina o Tusi Paia e ono. Iā Iulai 4, 2020, na tatala ai i gagana Bislama ma le Oromo le Tusi Paia o le Faaliliuga a le Lalolagi Fou. I le aso na sosoʻo ai iā Iulai 5, na tatalaina ai i le gagana Latvia ma le gagana Marathi le Faaliliuga a le Lalolagi Fou, ae na tatalaina i le gagana Bengali ma le gagana Karen (S’gaw) le Faaliliuga a le Lalolagi Fou o Tusitusiga Eleni. Na tatalaina nei Tusi Paia i masini faaonapōnei e ala i ni lauga na muaʻi puʻeina. Na mafai ona matamata pe faalogologo le ʻautalaʻi i le polokalame faapitoa, ma na matuā olioli ai i le mauaina o nei meaalofa faaleagaga.

Na tatalaina e le uso o Mark Sleger o se sui o le Komiti o le Lālā a Fiti le Faaliliuga a le Lalolagi Fou ua toe teuteuina. Na maua e le ʻautalaʻi i Vanuatu lenei polokalame lea na faia i le gagana Bislama ma faaliliuina i le Gagana Faataga a Bislama.

E silia ma le tolu tausaga na faaliliuina ai le Tusi Paia ma e lua ni vaega faaliliu na aofia ai. Na faapea mai se tasi o le ʻaufaaliliu: “O le a talisapaia e le ʻauuso le teuteuina o le Faaliliuga a le Lalolagi Fou ona e faigofie ona faitau, ma ua fetuunaʻi le gagana i le gagana o aso uma. O le a fesoasoani iā i tatou e malamalama atili ai i le upu moni.”

E matou te mautinoa o le a fesoasoani le Tusi Paia ua toe teuteuina i suʻesuʻega ma le talaʻiga a le silia ma le 700 o le ʻautalaʻi e tautatala i le gagana Bislama.

Na tatalaina e le Uso o Delroy Williamson o se sui o le Komiti o le Lālā a Ethiopia le Faaliliuga a le Lalolagi Fou i le gagana Oromo. E 12,548 uso ma tuafāfine na matamata pe faalogologo i lenei polokalame, e aofia ai ma le 2,000 tagata talaʻi o ē tautatala i le gagana Oromo.

Ona o tulaga faigatā faatekinolosi, na maua ai le faatagaga mai i le Vaega Pule e faasalalau atu le polokalame na muaʻi puʻeina e ala i se satelite a se ofisa faasalalau. Na mafai foʻi ona maua e le ʻautalaʻi le polokalame e faaaogā ai a latou telefoni.

E lima tausaga na galulue ai le ʻaufaaliliu e toʻalima i lenei faaliliuga. O le a matuā aogā lenei faaliliuga mo uso ma tuafāfine o ē o loo auauna i le oganuu telē o ē tautatala i le gagana Oromo.

Na tatalaina le Faaliliuga a le Lalolagi Fou i le gagana Latvia i le māeʻa ai o le 12 tausaga o galuega fitā. Na valaaulia faapotopotoga Latvia ma faapotopotoga Rusia uma i Latvia e maimoaina lenei polokalame.

Na faia e le Uso o Jouni Palmu o se sui o le Komiti o le Lālā a Finilani le lauga e tatalaina ai lenei Tusi Paia. Na ia faapea mai: “E matou te olioli e faailoa atu lenei faaliliuga fou, e faigofie ona faitau mo tagata e faitau i le gagana Latvia. Matou te faamoemoe o le a faatupulaʻia ai lo outou olioli e suʻesuʻeina ma manatunatu loloto i le Afioga a le Atua.”

Na faapea mai le faamatalaga a se tasi o sui o le ʻaufaaliliu o le Tusi Paia e faatatau i se tasi o vala mo suʻesuʻega o le Tusi Paia, “Ua pei lenei faaliliuga fou o le Tusi Paia o se masini faaonapōnei atamai, lea e mafai ona fai ai suʻesuʻega loloto a le tagata lava ia ma manatunatu loloto ai.”

Na tatalaina le Faaliliuga a le Lalolagi Fou i le gagana Marathi i se polokalame na faia mo faapotopotoga uma a Marathi i Initia. Na tatalaina e le Uso o Puneet Aggarwal o se sui o le Komiti o le Lālā a Initia lenei Tusi Paia.

E toʻaono le ʻaufaaliliu na faaalu le tolu tausaga e faamāeʻa ai lenei poloketi i le gagana Marathi. Na faapea mai se tasi o sui o lenā ʻaufaaliliu: “O le a fesoasoani tele lenei faaliliuga i mātua ma faiaʻoga o le Tusi Paia a o latou aʻoaʻoina a latou fanau po o i latou e faaalia le naunau i aʻoaʻoga moni o le Tusi Paia.”

Na faapea mai se isi tagata faaliliu: “Na matuā faafiafiaina aʻu i le iloaina ua toe tuu le suafa o le Atua o Ieova i lenei Tusi Paia, i vaega sa iai i uluaʻi tusitusiga. O le a mafai e le ʻaufaitau ona maua le suafa o Ieova i le toetoe o itulau uma o lenei faaliliuga, ma o le a faasilisilia ai le suafa o Ieova i tulaga e tatau ona iai.”

E silia ma le 83 miliona tagata e tautatala i le gagana Marathi i Initia tutotonu.

Na tatala e le uso o Ashok Patel o se sui o le Komiti o le Lālā a Initia ia Tusitusiga Paia i le Gagana Eleni i le gagana Bengali. E silia ma le 1,200 tagata talaʻi na mauaina lenei polokalame i Initia ma Bangladesh.

E silia ma le 265 miliona tagata e tautatala i le gagana Bengali, ma e lona fitu lenei gagana i gagana e aupito i toʻatele tagata e tautatala ai. Ina ia maua se faaliliuga e malamalama ai le toʻatele, na galulue soosootauʻau ai le ʻaufaaliliu mai vaega eseese o Initia ma Bangladesh mo le tolu tausaga e faamāeʻa ai le faaliliuga.

Na faapea mai le uso o Patel i lana lauga: “O le gagana Bengali o se tasi o gagana i Initia na muaʻi faaliliuina i ai le Tusi Paia. Na lomia le faaliliuga atoa o Tusitusiga Paia Eleni i le 1801. O se tasi o vala mataʻina o le uluaʻi Tusi Paia i le gagana Bengali, na maua ai le suafa o Ieova. Peitaʻi, i faaliliuga faaonapōnei ua suia ai le suafa o le Atua i le ‘Alii’. O le a maua i le Faaliliuga a le Lalolagi Fou o Tusitusiga Eleni se faaliliuga e saʻo ma faigofie ona malamalama i ai.”

Na faapea mai se sui o le ʻaufaaliliu: “O lenei faaliliuga o se faamaoniga o le alofa o Ieova i ituaiga uma o tagata, ma o loo ia valaaulia i latou ia iloa atili e faatatau iā te ia ma lona alo o Iesu Keriso.”

O le Uso o Hiroshi Aoki, o se sui o le Komiti o le Lālā a Myanmar na tatalaina le faaliliuga o Tusitusiga Paia Eleni i le gagana Karen (S’gaw). E toʻa 510 i latou mai i faapotopotoga e ono ma vaega e fa na mafai ona matamata ma faalogologo i le polokalame.

E sili laʻitiiti atu ma le tausaga na faamāeʻa ai lea galuega faaliliu i le gagana Karen (S’gaw). Na faapea mai se tasi o le ʻaufaaliliu: “O le a olioli uso ma tuafāfine faapea foʻi tagata i le fanua i le faitauina o lenei lomiga, ona ua toe faafoʻisia ai le suafa o Ieova ma o loo faaaogāina ai le gagana faaonapōnei. E manino, saʻo ma faigofie ona malamalama i ai. E tatou te faafetai iā Ieova mo lenei meaalofa mataʻina o le a fesoasoani iā i tatou ia vavalalata atu ai iā te ia e faaaogā ai le gagana e pāʻia ai o matou loto.”

Na faapea mai se isi tagata faaliliu: “O le Faaliliuga a le Lalolagi Fou o loo tusia i le gagana o aso uma, o le a fesoasoani lea i le ʻaufaitau e malamalama i faalogona o tagata o le Tusi Paia, faaata o latou tulaga, ma faaaʻoaʻo ai i lo latou faatuatua.”

E tatou te olioli faatasi ma o tatou uso ma tuafāfine na mauaina na Tusi Paia. E matou te mautinoa o nei Tusi Paia ua tatalaina o le a fesoasoani i le ʻautalaʻi o ē tautatala i nei gagana, e faaauau ona faalatalata atu iā Ieova ma faailoa atu pea upu moni isi.​—Ioane 17:17.