Iā Iuni 1, 2023, na toe amata ai maimoaga i ofisa o le Peteli i le lalolagi aoao, talu ona taofia mo le silia ma le tolu tausaga ona o le faamaʻi o le KOVITI-19. O se aso faapitoa mo sui o le aiga Peteli i le lalolagi aoao, ma le faitau afe o ē na asiasi mai.

Na faafeiloaʻia e sui o le aiga Peteli ē na asiasi mai i faailoilo, pese, faaalia o le laufofoga fiafia, ma opo māfana. Na faapea mai Ellis Bott, o lē na amata ona galue i le ofisa ulu i Warwick i Niu Ioka i le taimi o le faamaʻi: “O se vaaiga mataʻina le laulaututū o sui o le aiga Peteli ma a latou faailoilo, e faafeiloaʻi ai tagata asiasi mai. Na ou vaaia le fetagisi o le toʻatele ona o le fiafia, ma na faamanatu mai ai iā te aʻu le matuā tāua o le Peteli.” Na matuā fiafia Alexis Alexander, o se tasi e galue faavaitaimi ma e tausavali i le Peteli, i le faia o sona sao i le faafeiloaʻia ma le faaalia o le agaga talimālō i ē na asiasi ane. Na ia faapea mai: “O se mea mataʻina le molimauina o le alolofa o uso iā Ieova, ma lo latou fiafia i Lona maota.”

Na fiafia Mi-yeon Jo ina ua mafai ona la ō ma lana tama tama o Yoon, e valu tausaga, e asiasi i le ofisa o le lālā i Korea i Saute. E leʻi mafai ona moe lelei Yoon i lenā pō, ona o le fiafia tele o le a asiasi atu i le Peteli i le aso e sosoo ai. Na faapea mai Mi-yeon: “Ina ua ma feala aʻe i le taeao, na ma faalogologo i le pese e faatatau iā Kalepo ma Sofia a o asiasi i le Peteli. Na ma faalogologo atu ai foʻi a o alu le ma taavale i le Peteli.” Na fiafia tele Yoon i le asiasiga ma ia faapea mai: “Toe lava o ni manu avea loa Peteli ma parataiso.”

O Noah Johnsen, o se talavou mai i Alberta i Kanata, e aafia i se maʻi o maso o le tuasivi. Ua leva ona manaʻo e asiasi i le Peteli i Niu Ioka i Amerika, ae e lē mafai ona malaga i se vaalele ona o lona maʻi. O lea, na malaga ai i le taavale ma ona mātua i le mamao e tusa o le 4,100 kilomita, (po o le 2,500 maila) ina ia asiasi i le ofisa o le lālā i Wallkill i Niu Ioka, i le Iunaite Setete. Na faapea mai Noah e faatatau i lana asiasiga: “E tasi lava le upu ou te faamatalaina ai lenā asiasiga atoa, o le alofa. Na ou lagonaina le alofa o Ieova, ma le alofa o le ʻauuso.”

Na matuā fiafia foʻi Fyodor Zhitnikov, e 76 tausaga, ma lana avā o Yulita, ina ua la asiasi i le falemataʻaga i le Peteli i Kazakhstan. O se tasi o vaega o le falemataʻaga, o loo faailoa ai talaaga o uso ma tuafāfine na tumau faamaoni mo le tele o tausaga. E matuā tāua i le uso o Fyodor lenā vaega, ona na auauna faatasi ma le toʻatele o i latou. Na matuā talisapaia e le uso o Fyodor galuega na alu i le saunia o lenā vaega o le falemataʻaga. Na ia faapea mai: “Pe afai e teu lelei e uso faamaumauga o le galuega talaʻi ma galuega lelei mo le tele o tausaga, e sili atu la ona manatua e Ieova mea uma ma talisapaia galuega a tagata taʻitoʻatasi.”

Ua matuā faafiafiaina i matou, ona ua mafai ona toe faataga asiasiga i le Peteli i le lalolagi aoao. E matou te tulimataʻia le faafeiloaʻia o le faitau afe o ē e asiasi mai i le lumanaʻi!—Salamo 122:1.

O ata nei o uso ma tuafāfine, a o asiasi atu i ofisa ma falemataʻaga i Peteli.