Ua sosolo atu i Crimea teteega ogaoga a le pulega a Rusia e faasaga i Molimau a Ieova. E lē gata ua faasā e le malo o Rusia le lesitalaina faaletulafono o Molimau a Ieova, ae ua matuā aliali i lumāmea lo latou faanaunauga e tafiesea la latou tapuaʻiga filemu. Talu mai le faasāsāaga iā Aperila 2017, ua tele osofaʻiga ua faia e le pulega a Rusia i faatasiga a Molimau a Ieova i Rusia, ma iʻu ai i le puʻea ma le faafalepuipuiina o le toʻatele o Molimau a Ieova. Ua faaaogā foʻi na faiga sauā e faasaga i Molimau a Ieova i Crimea.

O le osofaʻiga tele muamua i Crimea na tupu iā Novema 15, 2018 i Dzhankoy, ina ua osofaʻia e le pe ā ma le 200 leoleo ma fitafita faapitoa ni fale se valu o aiga na faapotopoto ai ni vaega toʻaitiiti o Molimau, ina ia faitau ma iloiloina le Tusi Paia. E tusa ma le toʻa 35 leoleo faaauupegaina na ufiufi o latou foliga na ō atu faamalosi i le fale o Sergey Filatov lea na potopoto ai ni Molimau se toʻaono. Na faamataʻuina Molimau i lenā osofaʻiga sauā. Na taofia e leoleo se tamā matua e 78 ona tausaga agaʻi i le puipui o le fale, faafaō faamalosi o ia i le eleele, saisai ona lima, ma matuā sasa iā te ia ma iʻu ai ina ave faatopetope o ia i le falemaʻi. Na matuā faamataʻuina isi tamā matutua se toʻalua, ma faapea ona ave faatopetope ai i le falemaʻi ona ua matuā maualuga o la toto. O le mea e faanoanoa ai, ona na fafano le pepe a se tasi o tinā talavou lea na osofaʻia foʻi lona fale.

Ina ua uma le osofaʻiga, na molia ai faasolitulafono Sergey Filatov i lalo o le Vaega 282.2(1) o le Tulafono mo Solitulafono a Rusia i le faamaopoopoina o galuega a se “faalapotopotoga faatupu faalavelave.” Iā Mati 5, 2020, na faasala ai e le Faamasinoga Faaitumalo i Crimea ia Sergey Filatov mo le ono tausaga i se falepuipui. Ina ua uma ona lau lona faasalaga, na ave saʻo loa o ia i le falepuipui.

I tausaga mulimuli ane talu mai le osofaʻiga i Dzhankoy i le 2018, o loo faaauau pea ona osofaʻia e fitafita faapitoa fale o Molimau a Ieova o loo latou masalomia i gaoioiga faatupu faalavelave. O le osofaʻiga lata mai nei lava, na faia iā Me 22, 2023. Na osofaʻia e ni leoleo e silia ma le toʻasefulu se fale i Feodosia i le 6:30 i le taeao, ma o le toʻalima o na leoleo na faaauupegaina. Na latou faatonuina Molimau e taooto i le foloa, a o latou suʻeina le fale mo le silia i le tolu itula. Na latou taofia ai se alii Molimau ma latou aveina i Sevastopol mo suʻesuʻega.

O le iʻuga o nei osofaʻiga ma faamasinoga na faia mulimuli ane, ua faafalepuipui ai tane Molimau a Ieova e toʻaiva mo le umi e oo atu i le ono ma le afa tausaga. Na molia uma i latou i le faaauilumaina o galuega a se faalapotopotoga faatupu faalavelave.

1. Iulai 18, 2024

   Na faafalepuipui ai Molimau a Ieova e toʻaiva i Crimea.

2. Me 22, 2023

   Na osofaʻia e ni leoleo le fale o se Molimau i Feodosia. Na ave faamalosi e leoleo masini faaonapōnei a Molimau na iai, ma taofia se tasi o i latou.

3. Aokuso 5, 2021

   Na osofaʻia fale o aiga Molimau e toʻavalu ma puʻea ai Aleksandr Dubovenko ma Aleksandr Litvinyuk.

4. Oketopa 1, 2020

   Osofaʻia ni fale se iva i Sevastopol. Na puʻeina Igor Shmidt ma tuu i se nofoaga o faasalaga e faatalitali ai lona faamasinoga.

5. Iuni 4, 2019

   Na osofaʻia ai e leoleo faapitoa fale o Molimau a Ieova e toʻa 10 i Sevastopol. Na molia ai Viktor i le faia o gaoioiga faatupu faalavelave.

6. Mati 20, 2019

   Osofaʻia e fitafita faapitoa fale e valu o aiga i Alupka ma Yalta. Ua tuʻifesili Artem Gerasimov ma molia mulimuli ane i le faamaopoopoina o galuega faatupu faalavelave.

7. Novema 15, 2018

   Osofaʻia fale e valu o aiga e le silia i le 200 leoleo ma fitafita faapitoa i Dzhankoy, e aofia ai le fale o Sergey Filatov.