Na faatulaga e le Komiti o le Lālā i Pasili ni Komiti o Fesoasoani mo Mala (DRC) e 18 e faasoasoaina fesoasoani i tagata talaʻi na aafia i faigatā tau tamaoaiga ona o le faamaʻi o le coronavirus. O loo fesoasoani nei DRC i le pe a ma le 12,000 faapotopotoga i le atunuu atoa, e aofia ai ma o tatou uso e nonofo i vaipanoa maotua o le vaitafe o le Amazon. E oo mai i le asō, e 131 aiga i le Amazon ua mauaina le fesoasoani.

O le DRC i Manaus, le laumua o le setete o le Amazonas, na latou saunia ni afīfī e maua ai mea manaʻomia mo le masina e tasi. E i totonu o na afīfī ia meaʻai e pei o pi, falaoamata manioka, araisa, susu pauta, ma mea e manaʻomia mo le tumamā e pei o fasimoli, pepa mo falelētaʻua, pulumu fufulu nifo ma kulimi fufulu nifo. Na lafo atu e uso nei afīfī i le uafu e lata i Manacapuru ona faaaogā lea o vaa e tufa atu ai i nuu mamao e aofia ai Membeca ma Lago do Castanho.

Ina ua maua e le tuafafine o Marinelma lea e nofo i le vaipanoa o Lago do Castanho le afīfī o meaʻai, na ia faapea mai: “E muamua lava ona ou faafetai iā Ieova mo le tausiga o matou. Na telē lo matou manaʻoga ona sa leai se tupe e faatau ai ni a matou meaʻai. Ou te faafetaia foʻi uso mo lo latou limafoaʻi ma le alofa. Na vaai mai laʻu tama tama e ono tausaga o oʻu tatalaina le afīfī, ma na ou faamalamalama atu iā te ia na faaaogā e Ieova uso e fesoasoani mai iā i matou. Ona faapea mai lea o laʻu tama, ʻMom, e mafai ona fai se ta tatalo e faafetai ai iā Ieova?’”

Na taʻua i se tusi na lafo atu i le DRC e le uso o Jonas Monteiro o lē e nofo i le taulaga o Caapiranga e faapea: “Faafetai tele lava mo le fesoasoani ua matou maua, ua matou vaaia le aao o Ieova e ala mai iā te outou. Ma o se matuā faaeaga le avea ma vaega o lenei aiga i le lalolagi aoao.”

Na maua foʻi e uso i le DRC aogā mai i lenei faatulagaga. Na faapea mai Isaac Emannuel Ramalho de Oliveira o se toeaina i le DRC: “O aso uma lava ou te galue ai i le Komiti o Fesoasoani mo Mala, e faamalosia ai lava loʻu faatuatua. Ou te mautinoa ua tele atu aogā ua ou mauaina nai lo o mea e mafai ona ou faia mo le ʻauuso.”

E faamalosia ai lo tatou faatuatua i le vaaia o le tausiga a Ieova o ana auauna i lenei vaitaimi o le faamaʻi e tusa lava po o fea e tatou te i ai.​—Salamo 94:14.