O loo fuafua le Faamasinoga a le Aai o Furmanovsky i le Vaipanoa o Ivanovo e faailoa mai la latou faaiʻuga i le mataupu o loo aafia ai le Uso o Yevgeniy Spirin iā Iulai 14, 2020. Sa talosaga lōia a le Malo e faasalaina le Uso o Spirin mo le fitu tausaga i le falepuipui.

O loo molia le Uso o Spirin e 34 ona tausaga, i le faamaopoopoina lea o galuega a se faalapotopotoga e manatu le Malo o Rusia e “faatupu vevesi”. O lenei mataupu faasaga iā te ia na faamaʻite mai e se tagata suʻesuʻe o le Federal Security Service (FSB) iā Ianuari 21, 2019. Ina ua mavae le ono aso ae osofaʻia loa e sui o le FSB le fale o le Uso o Spirin ma lana avā o Natalya. Na faatonuina e le Faamasinoga Faaitumalo a Oktyabrsky i le Vaipanoa o Ivanovo le taofia o le Uso o Spirin i se nofoaga mo faasalaga mo le lē silia atu ma le lua masina e faatali ai lona faamasinoga, talu ai ona o ia o se Molimau a Ieova. O lenā faasalaga na mulimuli ane toe faaopoopo le umi.

Na tatalaina mai o ia mai i le nofoaga mo faasalaga lea sa faatali ai lona faamasinoga, ma taofia i lona fale ina ua māeʻa le 160 aso na faafalepuipui ai. Iā Tesema 18, 2019, na faatonuina ai e le Faamasinoga Faaitumalo a Oktyabrsky i le Vaipanoa o Ivanovo le tatalaina o le Uso o Spirin lea na taofia i lona fale e ui sa teena e le ʻau suʻesuʻe. E leai nisi faasāsāaga faaopoopo na toe faia iā te ia.

E tatou te tatalo ma faatuatua i lo tatou Tamā alofa i le lagi o Ieova o le a faaauau ona faatasi ma o tatou uso uma i Rusia, o ē o loo sauāina ona o lo latou faatuatua.​—1 Peteru 4:14.