FEPUARI 3, 2022
RUSIA

LIPOTI LATA MAI | Na Fesoasoani Ieova i le Uso o Aleksey Smelov Ina ia Tumau

PLAY

Iā Aperila 21, 2022, na molia ai e le Faamasinoga i le Aai o Kondopoga i le Itumalo o Karelia, le uso o Aleksey Smelov. Na sala tupe o ia i le 400,000 tupe Rusia ($5,012 tālā Amerika).

Mea na Tutupu

Iulai 23, 2019

Na molia e le malo le uso o Aleksey i ni tuuaʻiga e faapea, o ia o se tasi o taʻitaʻi o se faalapotopotoga faalelotu ua faasāina i le atunuu. Na ia faamaopoopoina ni faatasitasiga a lenā faalapotopotoga, ma le faia o “gaoioiga taufaasesē”
Iulai 31, 2019

Na osofaʻia e leoleo faapitoa (FSB) o le malo fale e 15 o Molimau a Ieova, ma nofoaga e faigaluega ai i aai o Kondopoga ma Petrozavodsk. Na latou faafoliga atu o ni palama, ma ō i le fale o Smelov ma suʻesuʻe. Na ave le uso o Aleksey ma lana avā o Irina i le ofisa o leoleo faapitoa (FSB) ma suʻesuʻe ai. Mulimuli ane, na auina atu ai Aleksey i le ofisa autū o le (FSB) i Petrozavodsk. Pe ā i le 11:30 i le pō, na tatala ai le uso ma le tuutuuga, e aua neʻi tuua le taulaga o loo nofo ai
Aokuso 7, 2019

Na molia faasolitulafono ai e le malo Aleksey e tusa ai ma tuutuuga o le Vaega 1 o le Tulafono 282.2 o Tulafono mo Soligatulafono a Rusia
Aperila 9, 2020

Na taofia ai le suʻesuʻeina o le uso ona o le faamaʻi o le KOVITI-19
Iuni 8, 2020

Toe faaauau suʻesuʻega

Talaaga

Aleksey Smelov

Tausaga Fanau: 1974 (Kondopoga)

Talaaga o le Soifuaga: A o talavou, na lelei tele lana aau ma le taaloga o le hockey. Na ia faigaluega muamua o se inisinia i se masini e vili ai mea ma se fale e gaosi ai pepa. Na galue pea o se inisinia i tausaga ua teʻa. Na fetaui ma lana avā o Irina i le 1993, ma faaipoipo i le lua tausaga mulimuli ane ai. E toʻatolu le la fanau, ma e toʻalua o loo latou nonofo faatasi

Talu mai lava lona laʻitiiti, na ia popole e faatatau i le mea e tupu i le tagata pe a oti. Na ia suʻesuʻeina le Tusi Paia ma Molimau a Ieova, ma ia aʻoaʻoina ai le faamoemoe o le toetū. O le iʻuga, na uunaʻia ai o ia e ola e ōgatusa ma tapulaa a le Tusi Paia ma papatiso ai loa i le 2004

Ana Faamatalaga

Ua faapefea ona e vaaia le fesoasoani a Ieova iā te oe i lenei taimi?

I nei tulaga faigatā, na matuā faamalosia le ma faiā ma Ieova, ona na ou vaaia le fesoasoani na ia saunia e foʻia ai le tele o nei faafitauli. O se faataʻitaʻiga, ina ua osofaʻia le matou fale na ave uma e leoleo a matou masini faaonapōnei. O lenā mea na matou lē toe maua ai meaʻai faaleagaga, ma lē mafai ai ona auai i sauniga a le faapotopotoga. Na matou tatalo iā Ieova e fesoasoani mai iā i matou. Na vave ona matou maua le fesoasoani e ala mai i uso ma tuafāfine. I ni nai aso mulimuli ane ai, ae maua a matou telefoni ma se tablet. Na mafai ai loa ona faaaogā e faitau ai le mau ma le Tusi Paia. O le fesoasoani tonu lea mai iā Ieova.

O ā ni fautuaga e mafai ona e faasoa atu i isi, e sauniunia ai i latou mo sauāga o le a fesagaʻia i le lumanaʻi?

Aua lava neʻi o tatou fefefe i se mea po o so o se tasi. O loo faatonutonuina e lo tatou Tamā mea uma. (2 Nofoaiga a Tupu 16:9a) Ia manatua, o se matuā faaeaga le faamamaluina o le suafa o Ieova ma lagolagoina lana pule silisili ese i le aoao o mea.

E tatou te mautinoa o le a faaauau ona “faaali atu [e Ieova] lona malosi iā i latou” uma o loo fesagaʻia so o se sauāga e pei o Aleksey.—2 Nofoaiga a Tupu 16:9.

E te Ono Fiafia Foʻi

TALA FOU

Faafalepuipui Ona o lo Latou Faatuatua—Rusia

Ua faafalepuipuiina Molimau a Ieova i Rusia ona o lo latou faatuatua. Ia faitau i mea na tutupu, ma ia maua se kopi o le lisi o igoa o Molimau o loo i le falepuipui.

TALA FOU