Ua matuā taʻusalaina e le Iunaite Setete ma le pe ā ma le 30 atunuu i Europa le faaauau pea o faasalaga ma sauāga ogaoga i o tatou uso i Rusia. O lenei taʻusalaina faavaomalo o Rusia na tupu i se fonotaga na talimālō ai le Fono Tumau a le Faalapotopotoga mo le Saogalemu ma le Felagolagomaʻi i Europa (OSCE) a iā Iulai 23, 2020.

I lana lauga i ē na auai i le fonotaga, na taʻua ai e Ms. Lane Darnell Bahl, o le sui faufautua mo faiga faapolotiki a le OSCE i le Iunaite Setete e faapea: “Ua uma ona taʻusalaina e le Iunaite Setete ma le toʻatele o isi o loo i lenei fonotaga, ma o le a faaauau pea ona matou taʻusalaina le malo o Rusia. O le māfuaaga ona o lipoti o osofaʻiga ua faia e Rusia i fale o Molimau a Ieova, o le molia o i latou i ni māfuaaga lē tonu, faaoo iā i latou sauāga ogaoga, ma ua oo lava ina tuuina i latou i le falepuipui, o nisi e mo le umi e oo atu i le ono tausaga.”

Na sili ona popole i latou na auai ona o lipoti lata mai faapea o sui o le malo o Rusia i le Vaipanoa o Voronezh, na latou osofaʻia le sili atu i le 100 fale o Molimau a Ieova. Na taʻua e Ms. Bahl, “O le tele ua oo i ai nei sauāga faasaga i se vaega toʻaitiiti o ni tagata tapuaʻi filemu o se tulaga e matuā mataʻutia lava.”

Na faailoa foʻi le popole o le taʻitaʻi lagolago o le ʻAuusufono a Peretania (UK) o Ms. Nicola Murray, i lona faapea mai, “o le faatupulaʻia o le fuainumera o tagata o loo suʻesuʻeina, faapea le faia o osofaʻiga i fale i le taimi e tasi, ua manino mai ai o nei sauāga, o ni taumafaiga na fuafua lelei e faasaga i Molimau a Ieova.” Na taʻua atili e Ms. Murray: “O ʻfaamaoniga’ ua latou faaaogā faasaga i Molimau a Ieova na molia ma suʻesuʻeina, e aofia ai le faaauau pea ona faia o galuega masani e fesootaʻi i la latou tapuaʻiga.”

E faaopoopo atu i lenā, na taʻua e Ms. Bahl, e sesē tuuaʻiga a ofisa o le malo i Voronezh faapea o Molimau na taofia ua faamaonia a latou solitulafono i le “faia o ni taupulepulega.” O nei taupulepulega e aofia ai le teuina o lipoti ma isi faamatalaga i masini faaonapōnei, faatasitasi o ni vaega, ma le faaaogāina o le initaneti e faia ai sauniga. Ua taʻua e Ms. Bahl nei tuuaʻiga mai le malo o Rusia e “valea ma mataga.” Na ia faapea mai: “Ou te ʻfaia ni taupulepulega’ i aso taʻitasi.” Na ia taʻua foʻi o sui o le ʻAuusufono a Rusia o loo auai mai i le fonotaga a le OSCE, e mautinoa o loo “solitulafono i le faia o nei gaoioiga.”

I se faamatalaga, b na faapea mai ai le 27 o atunuu o le Iuni a Europa (EU): “Ua matou faalogo soo i folafolaga a le ʻAuusufono a Rusia i le Fono Tumau e faapea ua mafai e Molimau a Ieova, ma o le a faaauau pea ona saʻoloto e faatino la latou tapuaʻiga, ma o lenā saʻolotoga e tapuaʻi ai ma o latou talitonuga o loo faamautinoa e le Faigāmalo Soofaatasi a Rusia. Peitaʻi, o loo faaauau pea ona vaaia le tele o lipoti o osofaʻiga i fale, o faasalaga, ma suʻesuʻega faasolitulafono e faasaga i Molimau a Ieova. E matuā tuufaafeagai nei tulaga ma folafolaga a le ʻAuusufono a Rusia.”

Na taʻua foʻi e le ʻAuusufono a le Iuni a Europa: “O tagata uma, e aofia ai ma Molimau a Ieova, e tatau ona olioli e faaaogā ma le filemu la latou aiā tatau, lea e aofia ai ma le aiā e saʻoloto ai e tapuaʻi ma faatino o latou talitonuga, le saʻolotoga e faatasitasi ai i ni faatasiga filemu, ma le saʻolotoga e faaali ai manatu, e aunoa ma le faailogatagata, e pei ona faamautinoa mai le Faavae o le Faigāmalo Soofaatasi a Rusia [faapea le] taʻutinoga ma le tiute tauave a Rusia i le OSCE i lalo o tulafono faavaomalo.”

Na faaiʻu mai e Ms. Murray faamatalaga a Peretania e ala i le fai atu iā Rusia ina ia faamuta loa le sauāina o Molimau a Ieova.

Na uunaʻia e Ms. Bahl Rusia ina ia: (1) faamuta suʻesuʻega o solitulafono e faasaga i Molimau a Ieova, (2) toe faafoʻi i Molimau a Ieova fanua ma le latou ofisa ulu i Rusia, ma le (3) ia faasaʻoloto loa i le taimi nei Molimau uma o loo faafalepuipuiina.

E lē o le taimi muamua lea ua taʻusalaina ai e faalapotopotoga faavaomalo Rusia ona o le sauāina o o tatou uso. Ua uma ona lapataʻia Rusia—ua iloa lelei e le lalolagi sauāga ogaoga o loo faia e le atunuu i o tatou uso ma tuafāfine. Ae e sili ona tāua, ona tatou te mautinoa o loo silafia e Ieova tulaga o loo fesagaʻia e o tatou uso ma tuafāfine i Rusia. (Salamo 37:18) E mautinoa o le a faaauau pea ona faamanuia e lo tatou Tamā alofa i le lagi lo latou faamaoni, lototele ma lo latou tumau.—Salamo 37:5, 28, 34.