Iā Iuni 26, 2020, na tuuina atu ai faasolitulafono e le falepuipui i Lgov le Uso o Dennis Christensen i se nofoaga mo faasalaga mamafa (EPKT), lea e masani ona ave i ai tagata e faia solitulafono matuiā. Talu ai o loo faasolo ina faalētonu lona soifua mālōlōina, o lenei gaoioiga o se taumafaiga e faavaivai atili ai o ia faapea lona faamaoni. E ono faia foʻi e le ofisa o lōia a le Malo ni tuuaʻiga sesē faasaga i le Uso o Christensen, e apili ai le vave tatalaina o ia i tua, o se faaiʻuga na lagolagoina muamua e le ofisa i le faamasinoga i ni nai aso na muamua atu.

Ua māeʻa ona tuliina e le Uso o Christensen le silia ma le afa o lona faasalaga faafalepuipui e ono tausaga le umi. Ua silia nei ma le tausaga talu ona agavaa o ia mo le palola po o le faaitiitia foʻi o lona faasalaga. E faatolu na tuuina atu lana talosaga ae na teena uma, ae ua talia nei e le faamasinoga lana talosaga lona fa. Iā Iuni 23, 2020, na faatonuina ai e le Faamasinoga Faaitumalo a Lgov le suia o le vaega o loo totoe o lona faasalaga i se sala tupe. Na iai se lōia a le Malo o Mr Artem Kofanov i le lauina o lona palola ma na ia lagolagoina le faaitiitia o le faasalaga.

Ina ua mavae le lua aso, na faapea mai ai se isi lōia a le Malo o Mr Aleksei Shatunov e lē faaletulafono le faaiʻuga ua faia e le faamasinoga, ma e tatau ona faalēaogāina. Na faatonuina foʻi le toe faia o se faamasinoga fou i le fale faamasino lava lea e tasi e se isi faamasino. Na faavae le talosaga a Mr Shatunov i lipoti lē lelei a le pulega o le falepuipui a Lgov lea na faapea mai ai o le Uso o Christensen “e lē o se tagata e galue mamafa ma e lē lelei ona uiga faaalia i le falepuipui.”

A o lauina le palola o le Uso o Christensen iā Iuni 23, na taʻua ai e i latou na fai ma sui o le falepuipui na tuuaʻiga, peitaʻi na manatu le faamasino e lē saʻo ia tuuaʻiga. Na faailoa e le lōia tetee i le faamasinoga lipoti a fomaʻi e faamaonia ai le faalētonu o le soifua mālōlōina o le Uso o Christensen, lea na māfua ai ona lē aofia o ia i galuega mamafa i le falepuipui. Ae i le isi itu, a o fai le molimau a se sui o le falepuipui, na ia taʻutino ai le leai o ni galuega i le falepuipui e fetaui ma le malosi o le Uso o Christensen.

A o taumafai le ofisa o lōia a le Malo e apili le vave tatalaina i tua o le Uso o Christensen, o le taimi lenā na tuuina atu ai e le pulega o le falepuipui ni lipoti se lua faasaga i le Uso o Christensen. O le lipoti muamua na taʻua ai lona iai i le potu ʻai i le taimi sesē, a o le isi lipoti na tuuaʻia ai i lona ofuina na o se mitiafu i totonu o le falepuipui e aunoa ma sona peleue. Ona o nei māfuaaga, na tuuina atu ai e le pulega o le falepuipui le Uso o Christensen i le EPKT mo aso e sefulu. E tusa ai ma tulafono a Rusia, e faatoʻā mafai ona faatino e le pulega a le falepuipui lenā tulaga pe afai ua faia soo e se pagota se gaoioiga matuiā e solia ai tulafono a le falepuipui, ma e tusa foʻi pe tupu lenā mea, e tatau i se fomaʻi ona siaki muamua le pagota. Ae talu ai e leʻi faamalieina na tulaga e tusa ai o le mataupu a le Uso o Christensen, sa leai la se faavae e tuuina atu ai o ia i le EPKT.

Sa iai faatasi le Uso o Christensen ma se isi pagota i se sela pe tusa ma le tolu mita (10 futu) i le lua mita (7 futu) le telē. O lenā potu ua sosolo ai le limu ma e lē lelei vaega e faaalu ai le ea, lea na atili aafia ai le soifua mālōlōina o le Uso o Christensen. Na aafia o ia i le niumonia i ni nai masina e leʻi mamao atu, ma o loo iai se faafitauli tugā i lona maea ario. Na faailoa mai e le lōia a le Uso o Christensen o loo “iloa e le pulega a le falepuipui lea tulaga, ae na latou tuua lava o ia e moe i luga o se moega malō lea na māfua ai le matuā tigā o lona tino.”

Na taʻua e le uso o Christensen i lana lōia, o le taimi lea na tuuaʻia ai o ia i le solia o tulafono, ae o loo latou iai faatasi ma isi pagota, ae e na o ia na tuuina atu i le EPKT. Na faapea mai le lōia a le Uso o Christensen, “E matou te talitonu o nei mea na fuafuaina lelei ina ia taofia ai Dennis mai i le tatalaina i tua, e tusa ai ma le poloaʻiga a le faamasinoga.”

A o taumafai le Malō o Rusia e faia so o se mea e osofaʻia ai o tatou uso i Rusia, e tatou te mautinoa o Ieova o lo latou lafitaga malupuipuia. Tau ina ia tatou tatalo e foaʻi atu e Ieova i le tatou Uso o Christensen ma lana avā o Irina mea uma la te manaʻomia, ina ia tutumau faamaoni ai aemaise i lenei taimi sili ona faigatā.​—Salamo 94:13, 21, 22.