Iā Iulai 15, 2020 na tuuina atu ai le Uso o Dennis Christensen i se nofoaga faapitoa mo faasalaga (SHIZO) mo le taimi lona lua. O le a taofia ai o ia i inā seʻia oo iā Iulai 27. Na tupu lenā mea ae faatoʻā fa aso talu ona aveese mai o ia mai i le SHIZO. Afai e toe tuuina o ia i le SHIZO mo le taimi lona tolu, o le a ono manatu loa le falepuipui o ia o se tagata ua “solia tulafono a le falepuipui” ma tuuina atu loa o ia i se isi nofoaga e sili atu ona mamafa faasalaga e faia ai (EPKT) mo le ono oo atu i le ono masina. O loo fuafua lōia a le Uso o Christensen e toe apili nei tuuaʻiga.

O loo faasalaina e ē o loo pulea le falepuipui le Uso o Christensen ona e lē o mafai ona ia faatino galuega ua tuuina atu e le falepuipui. Sa faatonuina e pule o le falepuipui le Uso o Christensen ina ia galue i le fale suʻisuʻi a le falepuipui. Peitaʻi o loo faasolo ina faalētonu lona soifua mālōlōina talu ona iai i le falepuipui. Na faapea mai fomaʻi o le falepuipui o loo malosi le Uso o Christensen mo le faia o galuega ua tuuina atu i ai, ma o loo iai foʻi taimi e mālōlō ma fai ana faamalosi tino. Peitaʻi, na iloiloina muamua le Uso o Christensen e se fomaʻi e lē galue i le falepuipui. Na faapea mai lenā fomaʻi e lē mafai e le Uso o Christensen ona fai galuega ua tuuina atu iā te ia ona o lona soifua mālōlōina.

I totonu o le SHIZO, e lē faatagaina pagota e faatau ni meaʻai, vili pe tali se telefoni, feiloaʻi ma isi e asiasi atu, po o le mauaina foʻi o ni faamomoli. O loo faatagaina e le tulafono pagota o loo i le SHIZO e talia asiasiga a faifeʻau. Peitaʻi, e lē mafai e le Uso o Christensen ona valaaulia ni toeaina e asiasi atu. Ua māfua lea tulaga ona ua lē o toe aloaʻia Molimau a Ieova o se tapuaʻiga e lesitala i totonu o Rusia.

E pei ona lipotia muamua, o le aso 23 o Iuni, na talia ai e le Faamasinoga Faaitumalo a Lgov le vave faasaʻolotoina o le Uso o Christensen ma faatonuina le suia o le taimi o loo totoe o lona faasalaga i se sala tupe. I nai aso na sosoo ai, na toe apili ai e lōia a le Malo lenā faaiʻuga. E foliga mai o loo auaufaatasi ē o loo vaaia le falepuipui faapea lōia a le Malo ina ia faaleagaina le talaaga lelei o le Uso o Christensen, ma taofia ai le vave tatalaina o ia i tua.

O loo iai pea i le Uso o Christensen ma lana avā o Irina se vaaiga saʻo. E matuā faalaeiauina i tatou i le vaai atu i le auala e fesoasoani ai pea Ieova i ana auauna faamaoni ia onosaʻia tofotofoga sili ona faigatā, e ala i le onosaʻi ma faaalia pea le olioli.​—Kolose 1:11.