Iā Fepuari 22, 2022, na tuuina mai ai e le Faamasinoga o Aiā Tatau a Tagata i Europa ni faaiʻuga se lua, e lagolagoina ai ni Molimau a Ieova e toʻa 15. O na faamasinoga na aofia ai le faileagaina e leoleo o o tatou uso, ina ua latou osofaʻia fale o o tatou uso i le vā o le 2010 ma le 2012. O na iʻuga, na faamanino mai ai le solia e Rusia o aiā tatau a o tatou uso ma tuafāfine e saʻoloto ai e tapuaʻi. Na faatonuina Rusia ina ia totogi atu i uso se tupe e silia ma le 99,000 tālā Europa ($112,323 tupe Amerika). O na faaiʻuga e lē mafai ona apili.

Na taʻua i faaiʻuga e lua a le Faamasinoga ni mataupu e ono e faasaga iā Rusia. a Na fesiligia e le Faamasinoga pe na iai se faatagaga faaletulafono e osofaʻia ai e leoleo fale o uso ma se Maota mo Sauniga, talai ofu o ni tuafāfine se toʻalua na latou puʻea a o talaʻi ma suʻesuʻe i laʻua, ma ave faamalosi meatotino a uso. O isi taimi na osofaʻia ma sauāina o tatou uso ma tuafāfine, e leoleo e pupuni o latou foliga ma faaauupegaina i auupega malolosi.

E iai taimi na saʻili atu ai mo ni faamatalaga lōia na tutū mo Molimau a Ieova iā André Carbonneau, o se lōia faavaomalo mo aiā tatau a tagata. Ua faapea mai o ia, o faaiʻuga mai i le faamasinoga “ua faataatia ai se faavae lea ua solia e Rusia, e ala i le osofaʻia faasolitulafono o fale o Molimau a Ieova, e aofia ai osofaʻiga e 1,700 lea na amata i le 2017 ina ua faasā le galuega a Molimau a Ieova. O lea, o so o se taimi lava e toe osofaʻia ai se fale o se Molimau a Ieova ona o lana tapuaʻiga, o se solitulafono lenā mea ma ua solia ai aiā tatau pe a fua i le Maliega mo Aiā Tatau a Tagata i Europa.” Na ia faapea atili mai: “E tāua le iloaina na faasala e le Faamasinoga leoleo a Rusia, ona na latou taofia le talaʻi o Molimau a Ieova mai i lea fale i lea fale. Ua faaalia ai, e vaai le ECHR i le galuega talaʻi o se gaoioiga faalelotu, ma e leai se aiā a leoleo e taofia ai.”

E ui o faaiʻuga na aumaia e le Faamasinoga e lē o taʻusalaina ai le sauāina o Molimau a Ieova i Rusia, ae ua faafaigofie ai i le Faamasinoga ona faia ni faaiʻuga, pe a toe faasā la tatou galuega i se taimi o i luma. E silia ma le 60 mataupu o loo aafia ai Molimau a Ieova i Rusia, o loo tālia se faaiʻuga mai i le ECHR. E tatou te talitonu o nei faaiʻuga e lua, o le a faavae ai faaiʻuga mo nisi mataupu e tulaʻi mai i se taimi o i luma.

E tatou te olioli i le iloa o loo amanaʻia e i latou e faatāuaina aiā tatau a tagata, le faamaoni atoatoa o o tatou uso ma tuafāfine i Rusia. O nei faaiʻuga, o se faamaoniga o le faamanuia a Ieova i taumafaiga, ina ia puipuia lona suafa ma lagolagoina lana pule silisili ese.—Salamo 26:11.