I le masina ua mavae, na faateteleina osofaʻiga taufaamataʻu a Rusia ma latou taofia ma faafalepuipuiina ai le toʻatele o Molimau a Ieova, e faavae i manatu pepelo e faapea o loo latou taumafai e faasagatau i faiga faatupu vevesi. Na osofaʻia e leoleo fale i Birobidzhan, Khabarovsk, Magadan, Orenburg, Naberezhnye Chelny, Perm, Pskov, Saratov, ma Tomsk. Na latou taofia tane Molimau e toʻa 15, ma ua oo ai i le 20 Molimau ua taofia e faatali o latou faamasinoga. E toʻalua nisi o loo nofo vaavaaia i o laʻua fale. A itiiti mai e 15 Molimau e aofia ai nisi ua 70 i le 80 tausaga le matutua, na sainia se maliega e lē mafai ai ona tuua le mea o loo nonofo ai. Iā Iuni 14, 2018, na faia ai e le malo o Rusia ni moliaga faasolitulafono faasaga i le silia ma le 40 Molimau. A faamaonia, e ono oo atu i le sefulu tausaga i le falepuipui lo latou faasalaga.

Na toe solia lava e le malo o Rusia la latou faamautinoaga i le faamasinoga, o le a lē aafia aiā tatau a Molimau taʻitoʻatasi o ē o loo faaalia lo latou faatuatua, ona o faasāsāaga na faia i faalapotopotoga faaletulafono a Molimau a Ieova. Ua matuā lē amanaʻia e Rusia la latou faamautinoaga ma faaaogā sesē ai le Vaega 282 o le Tulafono mo Soligatulafono ina ia molia ai Molimau i le auai, faamaopoopo pe faatupe se faalapotopotoga “faatupu vevesi.” O le mea moni, nai lo o le faasagatau i faiga faatupu vevesi, ae ua toe molia e Rusia ona tagatānuu ona o loo tapuaʻi ma le filemu.

Iuni 12, 2018, i Saratov. Na osofaʻia ma suʻeina e leoleo fale o nisi o Molimau ma latou aveina ai le pe ā ma le toʻasefulu o Molimau i le ofisa o leoleo e suʻesuʻeina ai. A o latou suʻeina se tasi o fale, na tuu faananā ai e leoleo ni lomiga faale-Tusi Paia lea e faasā e le faamasinoga i totonu o se fale. E toʻalima tane Molimau na taofia ai. Na mulimuli ane toe tatala le isi toʻalua, ae na taofia pea e leoleo le isi toʻatolu, ma molia ai Konstantin Bazhenov ma Feliks Makhammadiyev i le ʻfaamaopoopoina o galuega a se vaega faatupu vevesi.’ E leʻi mautū mai le moliaga o le Molimau lona tolu o Aleksey Budenchuk. Iā Iuni 14, 2018, na fai ai le faaiʻuga a le Faamasinoga Faaitumalo a Frunzenskiy i Saratov e taofia pea ia Bazhenov ma Makhammadiev e faatali ai lo la faamasinoga iā Aokuso 12, 2018. Na fai foʻi le faaiʻuga a le faamasinoga lava lea e taofia pea ia Budenchuk e faatali ai lona faamasinoga, ae e leʻi faamautū mai se aso e toe tatala ai o ia. E ese mai i lenā, na faatonuina foʻi e leoleo se isi Molimau e sainia se maliega e lē mafai ai ona ia tuua lenā vaipanoa.

Iuni 3, 2018, i Tomsk. I le 10:00 i le taeao, na osofaʻia ai e leoleo ma sui o le Vaegaʻau Faapitoa (Spetsnaz) a Rusia ni fale se lua o Molimau a Ieova i Tomsk i Siberia. Na latou taofia le pe ā ma le 30 Molimau, e aofia ai se tinā matua ua 83 ona tausaga. Na ave faamalosi e leoleo ia meatotino mai i na fale ma taavale, ma latou tuuina Molimau i pasi, ma auina atu loa i le Nofoaga e Taofia ai Tagata Faatupu Vevesi.

I lenā Nofoaga, na suʻesuʻeina faamalosi ai e Ivan Vedrentsev, Aleksandr Ivanov, ma Vyacheslav Lebedev, o i latou o ni tagata suʻesuʻe, ia nisi o Molimau seʻia oo i le 2:00 i le vaveao. Na faamataʻu e se tasi o le ʻau suʻesuʻe se tasi o i latou na taofia, o le a tuli o ia mai i lana galuega. I le taimi o le suʻesuʻega, na fai ma ō atu taavale a le falemaʻi i lenā Nofoaga, ma e tasi se Molimau na ave ma taofia ai i le falemaʻi.

Na faaauau pea ona taofia ia Sergey Klimov. Iā Iuni 5, 2018, na faatonuina ai e le Faamasinoga Faaitumalo a Oktyabrskiy i Tomsk le taofia pea o ia e faatali ai lona faamasinoga iā Aokuso 4, 2018, i lalo o le moliaga o le ‘faamaopoopoina o galuega a se faalapotopotoga faatupu vevesi.’ Na teena e le faamasino ni talosaga ina ia nofo vaavaaia ai o ia i lona fale, pe tatala foʻi i tua e faatali ai lona faamasinoga.

Iuni 3, 2018, i Pskov. Na osofaʻia e leoleo le tele o fale o Molimau a Ieova i Pskov. I se tasi o fale na taofia ma suʻesuʻeina tagata uma na iai e aofia ai ni mālō se toʻalua e lē o ni Molimau na asiasi atu i ai. O nisi Molimau a Ieova e aofia ai ma Gennadiy Shpakovsky na ave i le Pskov Regional Headquarters of the Federal Security Services (FSB) mo suʻesuʻega. O nisi o i latou na aveina i le ofisa o leoleo na faamalosia e molimau faasaga iā Shpakovsky. Na faama‘ite e le malo ni moliaga faasolitulafono faasaga iā te ia, i le ‘faamaopoopoina o galuega a se vaega faatupu vevesi.’ E ui na tatalaina o ia i se taimi mulimuli ane, ae mafai lava ona toe taofia o ia i so o se taimi.

Me 30, 2018, i Khabarovsk. Na taofia e leoleo ia Ivan Puyda i le māeʻa ai ona latou osofaʻia ma suʻeina lona fale. Na latou aveina o ia i Magadan ma taofia ai o ia i inā. Iā Iuni 1, 2018, na faatonuina ai e le Faamasinoga Faaitumalo a Zheleznodorozhniy ina ia taofia o ia seʻia oo i lona faamasinoga iā Iulai 30, 2018, i lalo o le tuua‘iga o le ‘faamaopoopoina o galuega a se vaega faatupu vevesi.’

Me 30, 2018, i Magadan. Na osofaʻia e leoleo faaauupegaina fai mata pulepule ia fale o i latou i Magadan ma taofia ai Konstantin Petrov, Yevgeniy Zyablov, ma Sergey Yerkin. Iā Iuni 1, 2018, na faatonuina ai e le Faamasinoga a le Aai o Magadanskiy ina ia taofia i latou e faatali ai lo latou faamasinoga iā Iulai 29, 2018, i lalo o le moliaga o le ‘faamaopoopoina o galuega a se vaega faatupu vevesi.’

Me 29, 2018, i Shuya, i le Itulagi o Ivanovo. Na taofia e le malo ia Dmitriy Mikhailov mo le taimi lona lua. I le māeʻa ai o se osofaʻiga iā Aperila 20, na molia ai o ia e leoleo i le tuuaʻiga o le ‘auai i galuega a se faalapotopotoga faatupu vevesi.’ Iā Me 29, na molia ai foʻi o ia e leoleo i le moliaga o le ‘faatupeina o galuega a le ʻau faatupu vevesi.’ Iā Iuni 3, 2018 na faatonuina ai e le Faamasinoga a le Aai o Shuya ina ia taofia o ia e faatali lona faamasinoga iā Iulai 19, 2018.

Me 27, 2018, i Naberezhnye Chelny, i le Republic of Tatarstan. Na osofaʻia i le po e leoleo a le FSB ni fale se sefulu ma latou aveina ai masini faaonapōnei, telefoni feaveaʻi ma tusifolau. Na aveina ma taofia ai foʻi ia Ilkham Karimov, Konstantin Matrashov, ma Vladimir Myakushin. Iā Me 29, 2018, na faatonuina ai e le Faamasinoga Faaitumalo a Naberezhnochelninskiy ina ia taofia i latou e faatali ai o latou faamasinoga iā Iulai 25, 2018, i lalo o le moliaga o le faamaopoopoina, le saʻilia o tagata fou, faapea le auai i galuega a se faalapotopotoga “faatupu vevesi.” Mulimuli ane, na taofia foʻi ia Aydar Yulmetyev, ma iā Me 31, 2018, na faatonuina ai e le faamasinoga e taofia o ia e faatali ai lona faamasinoga.

Me 22, 2018, i Perm. Ina ua toe foʻi mai Aleksandr ma Anna Solovyev mai i se la malaga i Moldova, na faafetaui laʻua e leoleo i le nofoaga e faatali ai nofoaafi. Na lokaina lima o Aleksandr ae ave ana meatotino, ma auina atu i laʻua i le ofisa o leoleo i ni taavale eseese se lua. A o taofia ia Aleksandr, na suʻeina e leoleo lona fale ma suʻesuʻeina lana avā. Iā Me 24, 2018, na faatonu ai e le Faamasinoga Faaitumalo a Sverdlovskiy le nofo vaavaaia o ia i lona fale i le tuuaʻiga o le ‘auai i galuega a se faalapotopotoga faatupu vevesi.’

Me 17, 2018, i Birobidzhan. I se osofaʻiga na fuafua lelei lea na taʻua o le Aso Faamasino, na osofaʻia ai e le 150 o leoleo ma sui o le FSB ia fale e 22 o Molimau a Ieova. Na ave e leoleo masini faaonapōnei, telefoni feaveaʻi faapea ma tupe. Na ave ma taofia e leoleo ia Alam Aliev, o se tasi o le toʻa 34 o Molimau na suʻesuʻeina i le taimi o le osofaʻiga a leoleo. Iā Me 18, na faatonuina ai e le Faamasinoga Faaitumalo a Birobidzhanskiy ina ia taofia o ia e faatali ai lona faamasinoga iā Iulai 13, 2018, i lalo o le moliaga o le ‘faamaopoopoina o galuega a se faalapotopotoga faatupu vevesi.’ Iā Me 25, 2018, na talia ai e le Faamasino o A. V. Sizova o le Appellate Court of the Jewish Autonomous Region le apili a Aliev ma faalēaogāina ai le taofia o ia e faatali ai lona faamasinoga.

Me 16, 2018, i Orenburg. Na osofaʻia ma suʻeina e leoleo ia nisi o fale. Na latou taofia ai Molimau e toʻatolu o Aleksandr Suvorov, Vladimir Kochnev, ma Vladislav Kolbanov. Iā Me 18, na fai ai le faaiʻuga a le Faamasinoga Faaitumalo a Promyshlenniy ina ia nofo vaavaaia ia Vladislav Kolbanov i lona fale i le moliaga o le ‘faatupeina o ni gaoioiga faatupu vevesi.’ I le aso na sosoʻo ai, na faatonuina ai e le faamasinoga lava lenā le taofia ai pea o Aleksandr Suvorov ma Vladimir Kochnev e faatali ai o la faamasinoga iā Iulai 14, 2018, i le moliaga o le ‘faamaopoopoina o galuega a se faalapotopotoga faatupu vevesi.’ Na faatonuina e le ʻau suʻesuʻe isi Molimau e toʻafitu ina ia sainia se maliega e latou te lē tuua lenā aai a o faagasolo suʻesuʻega.

Na faailoa aloaʻia mai e le Iuni a Europa (EU) faapea le Iunaite Setete, lo la taʻusalaina o le lē amanaʻiaina e Rusia o vaega tāua o le saʻolotoga. Ua faailoa atu e le EU iā Rusia e tatau ona ia “amanaʻia la latou taʻutinoga faavaomalo mo le saʻolotoga i tapuaʻiga po o talitonuga, le saʻolotoga e faaleo ai manatu faapea le saʻolotoga e faatasitasi ai.” Na faaopoopo atu foʻi le Iunaite Setete i le uunaʻia o Rusia ina ia “vave faasaʻoloto i latou uma o loo faafalepuipuiina, ona o le faaaogāina o lo latou sa‘olotoga i tapuaʻiga po o talitonuga.”

Na faapea mai Philip Brumley, o se Lōia mo Molimau a Ieova: “Ua matuā aafia Molimau a Ieova uma i le lalolagi aoao ona o sauāga o loo feagai ma o latou uso talitonu i Rusia. O loo feagai Molimau a Ieova ma na ituaiga o sauāga e tasi lea na latou aafia ai foʻi i lalo o pulega faa-Komunisi. O a latou gaoioiga ma faasāsāaga faifai pea, ua matuā lē amanaʻia ai ma le iloa e Rusia lana lava taʻutinoga ina ia faatāua aiā tatau a tagata.”

• Dennis Christensen

  E 45 tausaga mai i Oryol, na taofia talu mai Me 25, 2017, ma na faatonuina le nofo pea i le falepuipui seʻia oo iā Aokuso 1, 2018.

• Valentin Osadchuk

  E 42 tausaga mai i Vladivostok, na taofia talu mai Aperila 19, 2018, ma na faatonuina e nofo pea i le falepuipui seʻia oo iā Iuni 20, 2018.

• Viktor Trofimov

  E 61 tausaga mai i Polyarny, na taofia talu mai Aperila 18, 2018, ma na faatonuina e nofo pea i le falepuipui seʻia oo iā Oketopa 11, 2018.

• Roman Markin

  E 44 tausaga mai i Polyarny, na taofia talu mai Aperila 18, 2018, ma na faatonuina e nofo pea i le falepuipui seʻia oo iā Oketopa 11, 2018.

• Anatoliy Vilitkevich

  E 31 tausaga mai i Ufa, na taofia talu mai Aperila 10, 2018, ma na faatonuina e nofo pea i le falepuipui seʻia oo iā Iulai 2, 2018.