NIU IOKA—O le Aso Tofi, Me 3, 2018, o le a tuuina atu ai i luma o le Faamasinoga a le Aai o Saint Petersburg, le apili a Molimau a Ieova e faatatau i se faaʻiuga ina ia fāoa faamalosi lona ofisa autū i Rusia. Afai e teena le apili, o le a mafai loa e le Malo ona fāoa faamalosi i le taimi lava lenā le nofoaga lea e iai fale e 14. O le fanua lea o loo iai fale e pe ā ma le 25 eka (10 ha) ma e tusa ma le $31.8 miliona (2 piliona rubles) lona tau.

O le faaiʻuga na tuuina mai muamua e le Faamasinoga Faaitumalo a Sestroretskiy iā Tesema 2017, na latou lē amanaʻia ai faamaoniga o le ofisa o Molimau o loo umia e le Watch Tower Bible and Tract Society of Pennsylvania (WTPA), o se faalapotopotoga e faafoe e aunoa ma ni polofiti, ma o loo faamautū i le Iunaite Setete. O le tausaga e 2000 na tuuina atu ai e Molimau a Ieova i Rusia nei meatotino i lalo o le WTPA, ma e talu mai lenā taimi e pe ā ma le $3 miliona (188 miliona rubles) o lafoga i meatotino ua totogiina atu i le Faigāmalo Soofaatasi a Rusia. E ui o loo amanaʻia faaletulafono e le faigāmalo a Rusia le tuuina atu o na meatotino i le silia ma le 17 tausaga talu ai, ae ua faapea mai le faamasinoga faaitumalo e lē o aogā le maliega o le umiaina e le WTPS o nei meatotino. O le iʻuga, na faapea mai le faamasinoga o nei meatotino o loo umia e le ofisa o Molimau i Rusia lea e taʻua o le Administrative Center (AC). Talu ai na soloia e le Faamasinoga Maualuga le AC i le 2017, o le a mafai la e le Malo ona fāoa faamalosi na meatotino i le taimi lava lenā pe afai e teena le apili a Molimau.

O le a faia lenei faamasinoga i le 11:30 i le taeao i le Faamasinoga a le Aai o Saint Petersburg, ul. Basseynaya, 6, St. Petersburg, i Rusia.

Faafesootaʻi Mai mo Mataupu Tau Faasalalauga :

Faavaomalo: David A. Semonian, Ofisa o Faamatalaga mo le Lautele, +1-845-524-3000