Ua faailoa mai e le Iuni a Europa faapea le Iunaite Setete o la popolega i le auala o loo faileagaina ai e le malo o Rusia ia Molimau a Ieova. Na faailoa mai i na faamatalaga le lē moni o faamatalaga a Rusia e faapea, o le faasāina o faalapotopotoga faaletulafono a Molimau a Ieova, e lē o aafia ai le saʻolotoga o Molimau taʻitoʻatasi e tapuaʻi ai. Peitaʻi, e pei ona faailoa mai e le Iuni a Europa, o na “faamatalaga e lē o ōgatusa ma a latou [faigamalo a Rusia] gaoioiga.” I se faatusatusaga o faamatalaga a Rusia ma le auala o loo latou feagai ai ma Molimau, na faaiʻu mai le lipoti a le Iunaite Setete e faapea “e tuufaafeagai ma le mea o loo tupu.”

E to‘avalu alii Molimau ua faafalepuipuiina e le malo o Rusia ma e 12 suʻesuʻega o soligatulafono o loo faia i aai e 11. E ui i le faapopoleina ona o le faatupulaʻia o meatotino ua ave faamalosia, ae o le popolega autū lava o mafatiaga o loo feagai ma Kerisiano taʻitoʻatasi, o loo sauāina ona o lo latou faatuatua.

Ua fautuaina e le Iuni a Europa ma le Iunaite Setete le faigāmalo a Rusia ia amanaʻia lana taʻutinoga i le faatumauina o saʻolotoga o manatu, lotofuatiaifo, faapea tapuaʻiga po o talitonuga.

Vaega o loo maua ai lipoti:

https://www.osce.org/permanent-council/381820

https://www.osce.org/permanent-council/381823