E toʻavalu tane Molimau a Ieova o loo faafalepuipui i Sigapoa, ona e lē talia e o latou lotofuatiaifo le auai i le vaegaʻau. O le toʻatolu o i latou ua faafalepuipui faalua, ona e latou te teena le auai i le vaegaʻau. E lē o maua e nei tane talavou ni fesoasoani faaletulafono ona ua faamalosia e le malo o Sigapoa le auai i le vaegaʻau, ma e latou te lē amanaʻiaina le aiā tatau a nei tane e teena ai gaoioiga e lē taliaina e o latou lotofuatiaifo.

Pe a atoa le 18 tausaga o se tama, e tatau ona auai i le vaegaʻau a Sigapoa. Pe a musu e auai ona e lē taliaina e lona lotofuatiaifo, e oo atu i le 12 masina le umi e faafalepuipui ai i se nofoaga o le vaegaʻau. Pe a uma ona tuli lona faasalaga, o le a faasaʻoloto o ia ma faatonuina ina ia ofu i togiga a le vaegaʻau ma auai i toleniga. Pe a ia teena, e fai e le vaegaʻau lona faamasinoga ma e oo atu i le 18 masina le umi e toe faafalepuipui ai. O lea la, o se Molimau talavou e na te teena galuega faavaegaʻau ona e lē taliaina e lona lotofuatiaifo, e sosoo taimi e lua e faafalepuipui ai mo le umi e oo atu i le 30 masina.

Ua leva ona talosagaina e Malo Aufaatasi atunuu o loo faia aʻe ai, “o le lē taliaina e se tasi o le auai i le vaegaʻau ona e teena e lona lotofuatiaifo, e tatau ona vaai i ai o se faaaliga o lona saʻolotoga faaletulafono e faaalia ai ona manatu, o lona lotofuatiaifo ma filifili ai lana lotu, e pei ona amanaʻia e le Feagaiga Faavaomalo o Aiā Tatau a Tagata Soifua o le Lalolagi.” E ui o Sigapoa o se sui o Malo Aufaatasi talu mai le 1965, ae na ia faaalia lona lē ioeina o le talosaga a Malo Aufaatasi e faatatau i lenei mataupu. I se tusi na tusia e se tagata o le malo o Sigapoa iā Aperila 24, 2002, ma na auina atu i le Komisi mo Aiā Tatau a Tagata o Malo Aufaatasi, na ia taʻua ai e faapea “pe a feteenaʻi talitonuga ma gaoioiga a se tagata ma le [aiā a se atunuu e puipuia ai i latou], e tatau la ona faamuamua le aiā a le atunuu e puipuia ai.” Na matuā taʻu manino mai e lenei tagata o le malo e faapea, “E matou te lē talia le faatatauina i le lalolagi aoao o le lē auai o nisi i le vaegaʻau ona e lē taliaina e o latou lotofuatiaifo.”

1. Aokuso 16, 2024

   E toʻavalu Molimau a Ieova o loo faafalepuipui ona e lē taliaina e o latou lotofuatiaifo le auai i le vaegaʻau.

2. Aperila 24, 2002

   Na faamaonia atu ai e le faigāmalo a Sigapoa lo latou lē amanaʻia o le aiā tatau a tagata e teena e o latou lotofuatiaifo le auai i le vaegaʻau.

3. Fepuari 1995

   Na faateteleina ai le sauāina ma le puʻea o Molimau a Ieova o ni tagatānuu o Sigapoa.

4. Aokuso 8, 1994

   Na teena ai e le Faamasinoga Sili i Sigapoa le apili a Molimau a Ieova.

5. Ianuari 12, 1972

   Na faalēaogāina ai e le malo o Sigapoa le lesitalaina o Molimau a Ieova.