O loo fesagaʻia e o tatou uso ma tuafāfine i aai o Mariupol, Kharkiv, Hostomel, ma isi aai le tele o faigatā, a o faaauau ona tuʻi pomu e Rusia le atunuu o Ukraine. Pe ā ma le vaiaso, e lē o mafai e isi tagata ona tuua potu pito i lalo o o latou fale, po o nofoaga o loo latou sulufaʻi ai. O le utiuti o meaʻai, motusia o le eletise, faatasi ai ma le faalētonu o le Initaneti ma laina telefoni, ua faafaigatā ai fesootaʻiga.

O se tala faanoanoa, ona na maliu se uso e 28 tausaga e igoa iā Dmytro Rozdorskyi mai i Myrnohrad, ina ua tū i luga o se pomu. E tatou te tatalo mo i latou ua maliliu ē e pele iā i latou, faapea o tatou uso ma tuafāfine o loo iai i vaega o le atunuu o loo tuʻi pomu pea e Rusia.—2 Tesalonia 3:1.

Iā Mati 7, 2022, na lipotia mai ai vala nei mai i Ukraine:

• E toʻalua tagata talaʻi na maliliu

• E toʻavalu tagata talaʻi na manunuʻa

• E 20,617 tagata talaʻi na sulufaʻi atu i isi vaega saogalemu o le atunuu

• E 25 fale na matuā faaleagaina

• E 29 fale e tele vaega na faaleagaina

• E 173 fale e itiiti vaega na faaleagaina

• E lima Maota mo Sauniga na faaleagaina

• E 27 Komiti mo Fesoasoani Laveaʻi o loo faia galuega fesoasoani i Ukraine

• E 6,548 tagata talaʻi na fesoasoani tuusaʻo i ai Komiti mo Fesoasoani Laveaʻi ina ia maua nofoaga e malu ai

• E 7,008 tagata talaʻi na sulufaʻi atu i isi atunuu ma o loo fesoasoani i ai o latou uso tapuaʻi

• E tasi le Maota mo Fonotaga ma e pe ā ma le 30 Maota mo Sauniga i le itu i sisifo o Ukraine, i vaipanoa e pei o Chernevtsi, Ivano-Frankivsk, Lviv, ma Transcarpathian, ua saunia mo tagata sulufaʻi