E faanoanoa ona e toʻalua o tatou tuafāfine na maliliu a o tuʻi pomu le aai o Mariupol. I le taimi nei, e silia ma le 2,000 o tatou uso ma tuafāfine e lē o mafai ona sosola ese ona o le mamafa o fetauaʻiga. I ni nai aso ua tuanaʻi, e pe ā ma le 150 Molimau na mafai ona sosola ese. Na taumafai uso o loo galulue i le Komiti mo Fesoasoani Laveaʻi (DRC) e avatu le fesoasoani mo mea e manaʻomia i Mariupol, ae na toe foʻi ina ua osofaʻia a latou taavale, faatasi ai ma taavale a isi faalapotopotoga na ō e ave fesoasoani. Na pā se pomu i le nofoaga o loo iai le Maota mo Sauniga ma le Maota mo Fonotaga. I lenā taimi, e pe ā ma le 200 o tatou uso ma tuafāfine na faamautū i le potu pito i lalo o le Maota mo Sauniga. E leai se uso na aafia ai ae na o latou taavale na faaleagaina ma ua atili faigatā ai ona sosola ese mai le aai.

Na faapea mai se toeaina (o loo faaalia i le ata) na mafai ona sosola ese ma lana avā mai i le aai o Mariupol: “Ua leai se ma fale, leai ni a ma galuega ma ua leai foʻi ni fesootaʻiga ma a ma uō. E masani a e tasi le aso e ma te malaga ai, a o lenei e ono aso o ma ō mai. A o ma malaga [ese mai i le aai] na ma vaaia ai se asu mai i se pomu e leʻi pā, na taatia i autafa o le auala. A o ma malaga mai na fesoasoani uso i meaʻai, ma saʻili se mea e ma te momoe ai i le pō. Na ma lagona le tausiga alofa a Ieova iā i maʻua . . . O lenei mea ua faamautinoa mai ai iā i maʻua, e tatau ona ma maufaatuatuaina atoatoa Ieova.”

Na faimalaga atu uso ma tuafāfine sulufaʻi mai i Ukraine i nisi atunuu o Europa mo le saogalemu. O se faaaʻoaʻoga, na faimalaga atu se auauna o le faiva, o lana avā ma le la fanau e toʻatolu e 7, 11, ma le 16 tausaga le matutua i Potukali. O i inā o loo iai o latou tauaiga e Molimau a Ieova. E 11 itula o latou faatalitali e sopoʻia le tuaoi, ona latou faimalaga atu loa lea i le 4,000 kilomita (2,485 maila) mo le fā aso. Na latou taunuu ae toeitiiti lava amata le sauniga a le faapotopotoga. E ui e lē tautatala i le gagana Potukali, ae na faaauau pea la latou faasologa faaleagaga ma auai i le sauniga. Na maofa le faapotopotoga ona o foliga fiafia o lenei aiga e ui lava i tulaga faigatā o loo latou fesagaʻia.

Na faamatala foʻi e se isi tuafafine na sosola atu ma lona aiga i Siamani e faapea: “O le faitauina o le Tusi Paia, manatunatu i mea lelei na tutupu i o matou olaga, ma mafaufau i le faamoemoe matagofie, na matuā faamalosia ma faalaeiauina ai i matou. . . . Na matou lagona o loo taʻitaʻia i matou e Ieova ma fesoasoani mai e ala i o tatou uso. Na latou faafeiloaʻi ma fesoasoani mai iā i matou a o matou iai i Ukraine, i Hagakeri, ma e oo lava foʻi i inei i Siamani!”

E manino mai, o loo fesoasoani pea Ieova i o tatou uso ma tuafāfine peleina i Ukraine.—Salamo 145:14.

O vaega nei na lipotia mai i Ukraine talu mai Mati 16, 2022. O nei faamaumauga na faavae i lipoti na tuuina mai e uso o loo i Ukraine. Atonu e sili mamao atu le faitau aofaʻi e tatau ona iai, ae ona o le faigatā o fesootaʻiga i vaipanoa uma o le atunuu:

• E toʻafā tagata talaʻi ua maliliu

• E toʻa 19 tagata talaʻi na manunuʻa

• E toʻa 29,789 tagata talaʻi na sulufaʻi atu i isi vaega saogalemu o le atunuu

• E 45 fale na faaleagaina

• E 84 fale na matuā faaleagaina

• E 366 fale e leʻi tele se vaega na faaleagaina

• E 16 Maota mo Sauniga na faaleagaina

• E 27 Komiti mo Fesoasoani Laveaʻi o loo faia galuega fesoasoani i Ukraine

• E toʻa 20,981 tagata talaʻi na fesoasoani tuusaʻo i ai le Komiti mo Fesoasoani Laveaʻi ina ia maua nofoaga saogalemu e malu i ai

• E toʻa 11,973 tagata talaʻi na sulufaʻi atu i isi atunuu ma o loo fesoasoani i ai o latou uso tapuaʻi