E matou te lē ʻalofia i latou ua papatiso o ni Molimau a Ieova ae e lē o toe talaʻi, pe atonu foʻi ua amata ona lē toe faifaimea faatasi ma o latou uso tapuaʻi. Ae o le mea moni, e matou te taumafai malosi e fesoasoani iā i latou ia toe naunau i mea faaleagaga.

 E lē otometi ona faateʻaina se tasi e faia se agasala matuiā. Peitaʻi, afai e fai ma masani a se Molimau papatiso le solia o tapulaa tau amio a le Tusi Paia e aunoa ma le salamō, o i inā la e faateʻaina pe ʻalofia ai o ia. Ua faatonu manino mai i le Tusi Paia: “Ia faateʻaeseina lenā tagata leaga mai iā te outou.”—1 Korinito 5:13.

 Ae e faapefea pe a faateʻaina se tane, ae o loo avea pea lana avā ma la laʻua fanau o ni Molimau a Ieova? O le a iai la suiga i le sootaga faaletapuaʻiga o lenā tagata ma lona aiga, ae e tumau pea lo latou sootaga faaleaiga. E faaauau pea ona feutagaʻi o ia ma faaalia le alofa i lana paaga ma lona aiga e pei ona masani ai.

 E mafai ona auai pea se tasi ua faateʻaina i a matou sauniga faaletapuaʻiga, ma maua ni fautuaga faaleagaga mai i toeaina o le faapotopotoga pe a manaʻo i ai o ia. O le sini autū, ina ia fesoasoani iā te ia ina ia toe agavaa e avea o se Molimau a Ieova. Pe a teena e se tasi ua faateʻaina amioga lē tatau ma faaalia le naunau moni e ola e tusa ai ma tapulaa o le Tusi Paia, e mafai ona toe avea o ia ma sui o le faapotopotoga.