Talafatu: E lē faamanatu e Molimau a Ieova le Eseta auā e lē o i latou o ni Kerisiano.

 Tala Moni: E matou te talitonu o Iesu Keriso o lo matou Faaola, ma e matou te faia le mea sili e “mulimulituʻi ai i ona tulaga aao.”—1 Peteru 2:21; Luka 2:11.

 Talafatu: E tou te lē talitonu na toetū mai Iesu.

 Tala Moni: Matou te talitonu na toetū mai Iesu; matou te ioe e tāua lenā i le faatuatua o Kerisiano ma faamatilatila atu foʻi i la matou talaʻiga.—1 Korinito 15:3, 4, 12-15.

 Talafatu: E tou te lē popole pe a lē maua e tou fanau le fiafia pe a faamanatu le Eseta.

 Tala Moni: Matou te alolofa i a matou fanau. Matou te faaalu le taimi ma le malosi e toleni ma fesoasoani iā i latou ina ia maua le fiafia.—Tito 2:4.

•   O le aso faamanatu o le Eseta, e lē faavaeina mai i le Tusi Paia.

•   Na poloaʻia e Iesu le faamanatuina o lona maliu ae lē o lona toetū. E matou te faia lenei Faamanatuga i tausaga taʻitasi i le aso na maliu ai Iesu, e tusa ai ma le kalena faaletausaga a le Tusi Paia.—Luka 22:19, 20.

•   Matou te talitonu o tū masani o le Eseta, e tupuga mai i faiga faaletapuaʻiga i aso anamua ina ia fua tele le laueleele ma faatoʻateleina fanau a tagata, ma o le māfuaaga lenā e lē taliaina ai e le Atua. E finagalo le Atua ia tatou ‘⁠tapuaʻi atu tau lava o ia,’ ma e lē fiafia lona finagalo i tapuaʻiga e aofia ai faiga e na te teena.—Esoto 20:5; 1 Tupu 18:21.

 E matou te talitonu o la matou filifiliga e lē faamanatu le Eseta, e faavae moni mai lava i le Tusi Paia, lea o loo fautua mai e faaaogā le “atamai aogā ma le mafaufau lelei,” nai lo o le tau ina mulimuli i tū masani a tagata. (Faataoto 3:21; Mataio 15:3) A o matou faasoa atu i isi o matou talitonuga e uiga i le Eseta pe a fesili mai, e matou te faaaloalo foʻi i aiā tatau a tagata e faia ai a latou lava filifiliga.—1 Peteru 3:15.