E lē faamanatuina e Molimau a Ieova aso fanau, ona e latou te talitonu e lē fiafia ai le finagalo o Ieova. E ui e lē o faamatala auʻiliʻili mai i le Tusi Paia le māfuaaga o le lē faamanatuina o aso fanau, ae ua faailoa mai ai iā i tatou le amataga mai o nei aso faamanatu, ma malamalama ai i le silafaga a le Atua i na aso. Iloilo vala nei e fā ma mataupu silisili o le Tusi Paia e fesootaʻi atu i ai.

1.   O aso fanau e iai lona amataga faapaupau. E tusa ai ma le lomifefiloi Funk & Wagnalls Standard Dictionary of Folklore, Mythology, and Legend, o nei aso faamanatu e tupuga mai i le talitonuga e faapea, “e ono osofaʻia e agaga leaga se tasi i lona aso fanau. Ae o le auai o uō i le faamanatuina o le aso fanau ma faamanuia atu i ai, o le a fesoasoani e puipuia ai o ia.” Ua taʻua i le tusi The Lore of Birthdays: “O faamaumauga o aso fanau, sa tāua tele i aso anamua ona sa fesootaʻi atu i le saʻiliʻili i fetu” lea sa faavae mai i “faiga faaagaga ia e suʻesuʻeina paneta ma fetu.” Ua faapea atili mai lenei tusi, “na talitonu le taatele, o le faaaogāina o molīgaʻo i aso fanau, e fesootaʻi atu i faiga faamaneta ina ia maua ai se mea e manaʻo ai.”

    Peitaʻi e taʻusalaina e le Tusi Paia faiga faataulāitu, o valovaloga, faiga faaagaga po o “mea faapena.” (Teuteronome 18:14; Kalatia 5:​19-​21) O se tasi o māfuaaga na faasalaina ai e le Atua le aai o Papelonia anamua, ona sa saʻiliʻili tagata i fetu, o se faiga lea e vavalo ai mo le lumanaʻi. (Isaia 47:11-​15) E tusa lava po o fea e tupuga mai ai nei aso faamanatu, ae e usiusitaʻi Molimau a Ieova pe a latou maua ni faatonuga manino mai i le Tusi Paia.

2.   E leʻi faamanatuina e uluaʻi Kerisiano aso fanau. Ua taʻua i le The World Book Encyclopedia, “na latou manatu i le faamanatuina o aso fanau o se tū faapaupau.” Ua faailoa mai e le Tusi Paia le faaaʻoaʻoga na faataatia e aposetolo ma isi na aʻoaʻoina e Iesu, lea e manaʻomia ona tatou mulimuli i ai.​—2 Tesalonia 3:6.

3.   E na o le pau le aso e manaʻomia ona faamanatu e Kerisiano, o le aso na maliu ai Iesu. (Luka 22:17-​20) E lē o se mea e faateʻia ai, auā ua taʻua i le Tusi Paia, ʻe sili le aso e oti ai nai lo o le aso e fanau mai ai.’ (Failauga 7:1) Na faia e Iesu se igoa lelei ma le Atua a o soifua i le lalolagi, ma na sili atu le aso na maliu ai o ia nai lo le aso na fanau mai ai.​—Eperu 1:4.

4.   E lē o taʻua i le Tusi Paia se auauna a le Atua na faamanatu sona aso fanau. E na o le lua aso fanau o loo taʻua i le Tusi Paia, ae lē o ni tagata e auauna i le Atua. Ae i na aso fanau uma, na iai ni mea leaga na tutupu ai.​—Kenese 40:20-​22; Mareko 6:​21-​29.

 I le avea ma mātua lelei, e faaalia ai e Molimau le alofa i taimi uma iā latou fanau, e aofia ai le avatu o ni meaalofa ma faia ni faatasitasiga e fiafia ai. E latou te faaaʻoaʻo i le faaaʻoaʻoga lelei atoatoa a le Atua, o lē na te aumaia mea lelei i lana fanau i taimi uma. (Mataio 7:​11) O faamatalaga o loo mulimuli mai, e faaalia ai e lē lagona e fanau Molimau le lē alofagia:

•   “E sili atu lou fiafia pe a e mauaina se meaalofa e te leʻi faatalitalia.”​—Tammy, 12 tausaga.

•   “E ui lava e lē maua ni aʻu meaalofa i loʻu aso fanau, ae e masani ona aumai aʻu meaalofa mai oʻu matua i nisi taimi. Ou te fiafia pe a ou maua ni meaalofa i se taimi ou te leʻi faatalitalia.​—Gregory, 11 tausaga.

•   “Pe seʻiloga ua iai ni keke ma usu ni pese mo na o le 10 minute ona faatoʻā taʻu lea o se patī? E tatau ona e sau i lo matou fale ma e iloa ai le mea taʻu o le patī!”​—Eric, 6 tausaga.