•  E faapefea ona iloilo e Molimau a Ieova pe e tatau ona latou faamanatuina se aso faamanatu?

•  Pe e alolofa Molimau a Ieova i o latou aiga, e ui e latou te lē faamanatuina aso faamanatu?

•  Pe e taʻu atu e Molimau a Ieova i isi e aua le faamanatuina se aso faamanatu?

 A o leʻi filifili se Molimau a Ieova pe e auai i se aso faamanatu, e latou te iloilo muamua le Tusi Paia. O nisi aso faamanatu ma aso mālōlō e manino lava le solia ai o tapulaa a le Tusi Paia, ma e lē faia ai se sao o Molimau a Ieova. Ae e iai isi aso faamanatu e faia ai e se Molimau a Ieova lava ia lana filifiliga pe e auai ai, ma ia ʻmaua ai se lotofuatiaifo lelei i luma o le Atua atoa ma tagata.’​—Galuega 24:16.

 O nisi o fesili o loo mulimuli mai, e fesili ai se Kerisiano lava ia pe e tatau ona ia faamanatuina se aso faamanatu. a

•   Pe e faavae le aso faamanatu i aʻoaʻoga e lē faale-Tusi Paia?

   Mataupu silisili o le Tusi Paia: “ʻIa ō ese ai mai iā i latou, ma ia outou vavaeese,’ ua fetalai mai ai Ieova, ʻma aua tou te toe papaʻi atu i se mea e lē mamā.’”​—2 Korinito 6:​15-​17.

   Ina ia vavaeese atoatoa mai i aʻoʻoga lē mamā ia e feteenaʻi ma le Tusi Paia, e lē faamanatu ai e Molimau a Ieova aso faamanatu e aafia ai vala o loo mulimuli mai.

   O aso faamanatu e faavae i talitonuga i isi atua po o le tapuaʻi i isi atua. Na fetalai Iesu: “E tatau ona e tapuaʻi iā Ieova lou Atua, ma e na o ia foʻi e tatau ona e avatu i ai le auaunaga paia.” (Mataio 4:​10) O le mulimuli o Molimau a Ieova i lenā faatonuga e latou te lē faamanatuina ai le Kerisimasi ma le Eseta, ona e fesootaʻi atu na aso faamanatu i tapuaʻiga i isi atua nai lo o Ieova. E latou te lē auai foʻi i isi aso faamanatu nei.

  •  Tausaga Fou. Ua taʻua i le tusi The World Book Encyclopedia e faatatau i le amataga o lenei aso faamanatu: “Na faavae e le emeperoa o Roma o Iulio Kaisara le avea o Ianuari 1 e avea ma aso o le Tausaga Fou i le 46 T.A. Na faamamaluina e tagata Roma lenei aso mo le atua o Janus.”

  •  Thanksgiving (Aso o le Faafetai). E pei le aso faamanatu o le Thanksgiving o le aso faamanatu e taʻua o Kwanzaa, o lenei aso faamanatu e faavae mai i le faamanatuina o seleselega i aso anamua lea e faamamaluina ai atua eseese. A o faagasolo taimi, “na faamalosia ai e lotu Kerisiano nei aganuu anamua.”​—A Great and Godly Adventure​—The Pilgrims and the Myth of the First Thanksgiving.

   O aso faamanatu e faavae i faiga faaagaga po o le talitonuga i le laki. Ua taʻua i le Tusi Paia, o i latou “o ē ua laulauina se laulau mo le atua o le Laki” e aofia ai “ē ua tuua Ieova.” (Isaia 65:11) O lea, e lē faamanatuina ai e Molimau a Ieova aso faamanatu e pei o le:

  •  Tausaga Fou o le Lunar (Tausaga Fou a Saina po o le Tausaga Fou a Korea) “I lenei taimi o le tausaga, o le faanaunauga autū o aiga, uō ma tauaiga, o le faamautinoa lea o le a leai se mea leaga e tupu iā i latou a o faagasolo le tausaga, faamamaluina atua ma agaga, ma faamoemoe i faamanuiaga o le tausaga o le a faagasolo.” (Mooncakes and Hungry Ghosts​—Festivals of China) E faapena foʻi le Tausaga Fou a Korea, “e aofia ai tapuaʻiga i tuaa ua maliliu, tutuliese agaga leaga ma faamautinoa e leai se mea leaga e tupu iā i latou i le Tausaga Fou, ma faia valovaloga e faamautinoa ai po o ā mea ua valoia mai e le Tausaga Fou.”​—Encyclopedia of New Year’s Holidays Worldwide.

   O aso faamanatu e faavae mai i manatu e ola pea le agaga. E lē o aʻoaʻoina i le Tusi Paia e ola pea le tagata pe e iai se vaega o le tagata e ola pea pe a oti. Pe a oti le tagata, e faaumatia ona manatunatuga ma ona faalogona, ma e toe foʻi atu le tagata i le eleele. (Failauga 9:5, 10; Salamo 146:4) O lea, e lē faamanatuina e Molimau a Ieova le aso faamanatu o loo mulimuli mai:

  •  All Souls’ Day (Day of the Dead). O lenei aso e “faamanatu ai tagata uma ua maliliu” e tusa ai ma faamatalaga a le New Catholic Encyclopedia. “E mai i vaitaimi o le 500 T.A i le pe ā o le 1500 T.A., na taatele le talitonuga o agaga o loo i le pulekatolio, e mafai ona faaali mai i lenei aso o se aitu, faataulāitu, rane po o se isi mea, i se tasi na faileagaina i latou a o feola.”

   O aso faamanatu e fesootaʻi atu i faiga faataulāitu. Ua taʻua i le Tusi Paia: “O sē e faia valovaloga faataulāitu, o sē e faia faiga faaagaga, po o se tasi e saʻili i ni faailoilo o mea o le a tutupu po o se faataulāitu, po o se tasi e na te faalauatau i isi, po o se tasi e alu atu i sē e saʻili i agaga, po o lē e vavalo i mea e tutupu i le lumanaʻi, po o se tasi e fesili atu i ē ua oti. E inosia e Ieova i latou uma.” (Teuteronome 18:10-​12) O le lē faia o se vaega a Molimau a Ieova i faiga faataulāitu e aofia ai le saʻiliʻili i fetu (o se tasi o vala o valovaloga), e latou te lē faamanatuina ai le aso faamanatu o loo mulimuli mai:

  •  Halloween. Ua taʻua i le tusi Halloween—An American Holiday, An American History, o nisi o tagata Celt e latou te faia teuga e pei o ni aitu ina ia manatu ai agaga tataa o i latou o nisi o la latou vaega, ma lē amanaʻia ai i latou. E masani ona avatu e isi mea suamalie i agaga ina ia faafiafia ai i latou.

   O aso faamanatu e fesootaʻi atu i tapuaʻiga e tusa ai ma le Tulafono a Mose, lea na faaiʻuina i le taulaga a Iesu. Ua taʻua i le Tusi Paia: “O le iʻuga o le Tulafono o Keriso lea.” (Roma 10:4) O loo maua pea e Kerisiano aogā mai i mataupu silisili o le Tulafono a Mose lea na avatu iā Isaraelu anamua. Peitaʻi, e latou te lē faamanatuina tausamiga e tusa ai ma le Tulafono, aemaise tausamiga e faatatau atu i le Mesia lea e talitonu Kerisiano ua uma ona afio mai. Ua taʻua i le Tusi Paia “O mea na, o le ata o mea o loo i le lumanaʻi, a o le mea moni ua i le Keriso lea.” (Kolose 2:​17) Talu ai ua faataunuu fuafuaga o nei tausamiga, ma talu ai o loo aofia ai ma aganuu e teena i le Tusi Paia, o loo lisi atu i inei nisi o tausamiga e lē faamanatuina e Molimau a Ieova:

  •  Hanukkah. O lenei tausamiga e faamanatu ai le toe faapaiaga o le malumalu a tagata Iutaia i Ierusalema. Peitaʻi, o loo taʻua i le Tusi Paia ua avea Iesu ma Ositaulaga Sili o le “faleʻie e sili ma atoatoa ona lelei e leʻi faia e lima, o lona uiga, e lē o se foafoaga faalelalolagi.” (Eperu 9:​11) Mo Kerisiano, o le malumalu faaleagaga ua suia ai le malumalu faaletino lea na iai i Ierusalema.

  •  Rosh Hashanah. O le aso muamua lea o le tausaga a tagata Iutaia. I aso anamua, o lenei tausamiga e faia ai taulaga faapitoa e ofo i le Atua. (Numera 29:​1-6) Peitaʻi, o Iesu Keriso, o le Mesia, na māfua ai ona ʻfaamutaina taulaga i manu ma taulaga o meaalofa,’ ma ua lē toe tāua ai nei taulaga i le Atua.​—Tanielu 9:​26, 27.

•   Po o faaauiluma e aso faamanatu lotu tuufaatasi?

   Mataupu silisili o le Tusi Paia: “E faapefea ona tofusia le tagata faamaoni ma lē ua lē talitonu? E faapefea foʻi ona feagai le malumalu o le Atua ma tupua?”​—2 Korinito 6:​15-​17.

   E ui o le faanaunauga o Molimau a Ieova ia nonofo fifilemu ma o latou tuaoi ma faaaloalo i aiā a tagata taʻitoʻatasi e filifili ai ona ia lava talitonuga, ae e latou te teena aso faamanatu e faaauiluma ai lotu tuufaatasi i auala nei.

   O le faamanatuina o se tagata lotu lauiloa po o se mea na tupu lea e uunaʻia ai tagata e tapuaʻi faatasi e ui ina eseese o latou talitonuga. Ina ua taʻitaʻia e le Atua ona tagata anamua i se atunuu fou lea e iai a latou lava tapuaʻiga, na ia fetalai atu iā i latou: “Aua tou te faia se feagaiga ma i latou po o latou atua. . . . Afai e te auauna i o latou atua, e fai lea mea ma mailei iā te oe.” (Esoto 23:32, 33) O lea, e lē faamanatuina e Molimau a Ieova aso faamanatu e pei o lenei.

  •  Vesak. “O le aso sili lea ona paia i aso paia a le lotu Puta, e faamanatu ai le aso na fanau ai Puta, o lona poto, ma lona maliu, po o le ausiaina o Nirvana.”​—Holidays, Festivals, and Celebrations of the World Dictionary.

   Aso faamanatu e faavae i tū faalotu e lē o taʻua i le Tusi Paia. Na fetalai atu Iesu i taʻitaʻi lotu: “Ua outou faalēaogā ai le afioga a le Atua i a outou tū masani.” Na ia faapea atu foʻi e lē aogā la latou tapuaʻiga ona o loo “faavae a latou aʻoaʻoga i mataupu a tagata.” (Mataio 15:​6, 9) O le faatāuaina e Molimau a Ieova o lenei lapataʻiga, e latou te lē faamanatuina ai le tele o sauniga faalelotu.

  •  Tausamiga o le Siitiaga o Maria i le Lagi. O lenei tausamiga e faamanatu ai le talitonuga sa siitia aʻe i le lagi le tinā o Iesu i lona tino faaletagata. Ua taʻua i le Religion and Society​—Encyclopedia of Fundamentalism, “E leʻi iloa e uluaʻi Kerisiano lenei talitonuga ma e lē o taʻua foʻi i le Tusi Paia.”

  •  Tausamiga o le Sulufaga o Maria Imakulata. “E lē o aʻoaʻoina i le Tusi Paia le Sulufaga Imakulata [o Maria] . . . O se aʻoaʻoga na faia e le Lotu.”​—New Catholic Encyclopedia.

  •  Fāgafulu. O le vaitaimi o le salamō ma anapogi, ma e pei ona taʻua i le New Catholic Encyclopedia, sa faavaeina lenei tū i le “senituri lona fā,” ina ua mavae le silia i le 200 tausaga talu ona tusia le Tusi Paia. Ua faapea mai lenei lomifefiloi e faatatau i le aso muamua o le Fāgafulu: “O le tū o le mauaina e tagata faamaoni o le lefulefu i le Aso o le Lefulefu, sa amata ona talia e le Lotu i le 1091.”

  •  Faamamaluga o le Koluse Paia. Ua taʻua e le polofesa o Lubsky i lana tusi The Religious Studies, o se tasi lenei o faamanatuga e sili ona tāua, o le faamanatuina lea o le koluse, o le faailoga mo le faa-Kerisiano . . . E iloga lenei aso faamanatu i sauniga tetele lea e matuā aafia ai tagata talitonu.” Peitaʻi, e lē faaaogāina e Molimau a Ieova le koluse i la latou tapuaʻiga.

•   Pe e faasilisilia i lea aso faamanatu se tagata, faalapotopotoga, po o se faailoga faaleatunuu?

   Mataupu silisili o le Tusi Paia:“O le mea lenei ua fetalai mai ai Ieova: ʻIa malaia le tagata e tuu lona faatuatuaga i le tagata, ma faalagolago atu i le malosi o le tagata, ma o lē foʻi ua liliuese lona loto mai iā Ieova.’”​—Ieremia 17:5.

   E ui e manatu mamafa Molimau a Ieova i tagata ma tatalo foʻi mo i latou, ae e latou te lē auai i meafai po o le faamanatuina o vala nei:

   Aso faamanatu e faamamalu ai se pule po o se tagata lauiloa. Ua faapea mai le Tusi Paia, “A o outou, aua tou te faatuatua i le tagata, o lē o loo iai le mānava i ona pogaʻiisu, aiseā la e manatu ai fua iā te ia?” (Isaia 2:​22) O lea, e lē faamanatu ai e Molimau a Ieova le aso fanau o sē e iai le pule.

   Faamanatuina le fuʻa a le atunuu. E lē faamanatuina e Molimau a Ieova le Aso o le Fuʻa. Aiseā? Talu ai ua faapea mai le Tusi Paia: “Ia leoleo outou mai i tupua.” (1 Ioane 5:​21) Ua faapea mai nisi o tagata i aso nei, o le fuʻa e lē o se tupua e ao ona tapuaʻia, ae ua faapea mai le tusitala o le talafaasolopito o Carlton J. H. Hayes: “O le fuʻa o le faailoga sili lea o le lotonuu ma o le mea autū lenā ua tapuaʻi ai tagata.”

   Aso mālōlō po o aso faamanatu e faasilisilia ai se sagato. O le ā na tupu ina ua ifo se tagata e mataʻu i le Atua i le aposetolo o Peteru? Ua faapea mai le Tusi Paia: “Ua faatū o ia i luga e Peteru ma faapea atu: ʻTū ia i luga, o aʻu foʻi o se tagata.’” (Galuega 10:25, 26) Talu ai e leʻi taliaina e Peteru po o isi o le ʻauaposetolo se faaaloaloga faapitoa po o se faaviivii, e lē auai foʻi Molimau a Ieova i aso e faamanatu ai i latou e manatu i ai o sagato, e pei o aso faamanatu o loo mulimuli mai:

  •  All Saints’ Day. “O se tausamiga e faamamaluina ai sagato uma . . . E lē o iloa le tupuaga o lenei tausamiga.”​—New Catholic Encyclopedia.

  •  Name Day. Ua taʻua i le tusi Celebrating Life Customs Around the World, “O le aso o le faigaʻai mo le sagato e faaigoa ai se pepe, a lē o le taimi o lona papatisoga po o le taimi e faamautū ai lona faatuatuaga i se sauniga faalelotu. Ua taʻua atili ai foʻi, “o lenei aso e faia ai e tagata mea e fesootaʻi atu i lotu.”

   Faamanatuina o taumafaiga faapolotiki po o taumafaiga mo le soifua lautele. Ua taʻua i le Tusi Paia “E sili atu ona lelei le sulufaʻi iā Ieova, nai lo o le faatuatua atu i tagata.” (Salamo 118:​8, 9) Ina ia ʻalofia e Molimau a Ieova le atagia atu e latou te faatuatuaina tagata nai lo o le Atua i le foʻiaina o faafitauli o le lalolagi, e latou te lē auai i le faamanatuina o le Youth Day po o le Women’s Day lea e lagolagoina ai na taumafaiga. O le māfuaaga foʻi lea e latou te lē faamanatuina ai le Emancipation Day (aso e faamanatu ai e isi malo le taofia o faiga faapologa) po o isi aso faamanatu faapena. Nai lo o lea, e latou te talitonu o le Malo o le Atua e foʻia ai faafitauli e pei o le faailogatagata ma faiga lē tonu.​—Roma 2:​11; 8:​21.

•   Pe e faasilisilia i le aso faamanatu se atunuu po o se vaega o tagata nai lo o isi?

   Mataupu silisili o le Tusi Paia: “E lē faailogaina tagata e le Atua, ae o lē e mataʻu iā te ia i nuu uma lava, ma fai le amiotonu, e talia e ia.”​—Galuega 10:34, 35.

   E ui e fiafia le toʻatele o Molimau a Ieova i o latou atunuu, ae e latou te ʻalofia aso faamanatu e faasilisilia ai isi atunuu po o vaega o tagata e pei o manatu o loo taʻua i lalo.

   Mea e tutupu e faamamaluina ai vaegaʻau. E leʻi faalaeiauina e Iesu ona soo e auai i taua, ae na ia faapea atu iā i latou: “Ia alolofa atu pea i o outou fili ma tatalo pea mo ē ua sauāina outou.” (Mataio 5:​44) O lea, e lē auai Molimau a Ieova i aso faamanatu e faamamaluina ai fitafita, e pei o aso faamanatu o loo mulimuli mai:

  •  Anzac Day. “O le faaumi lea o le Anzac, Australian and New Zealand Army Corps,” ma “ua faasolosolo ona iloa le Anzac Day e manatua ai ē na maliliu i taua.”​—Historical Dictionary of Australia.

  •  Veterans Day (Remembrance Day, Remembrance Sunday, po o le Memorial Day). O nei aso mālōlō e faamamaluina ai “tagata matutua (veterans) sa auai i vaegaʻau ma i latou na fasiotia i taua a atunuu.”​—Encyclopædia Britannica.

   O aso faamanatu o le talafaasolopito o se malo po o le tutoʻatasi. Na fetalai Iesu e uiga i ona soo: “E lē o ni tagata o le lalolagi i latou, e pei foʻi o aʻu, e lē o aʻu o se tagata o le lalolagi.” (Ioane 17:16) E ui e fiafia Molimau a Ieova e aʻoaʻoina talafaasolopito o malo, ae e latou te lē auai i le faamanatuina o aso o loo mulimuli mai:

  •  Australia Day. E tusa ai ma faamatalaga a le Worldmark Encyclopedia of Cultures and Daily Life, o lenei aso e faamanatu ai “le aso i le 1788 ina ua sisi e fitafita Peretania a latou fuʻa ma faailoa mai le avea ai o Ausetalia ma a latou kolone fou.”

  •  Aso o le Tutoʻatasi. I le tele o atunuu, “o le aso lea ua faia faapitoa e faamanatu ai e le lautele le aso na latou tutoʻatasi ese mai ai i se malo.”​—Merriam-Webster’s Unabridged Dictionary.

•   Po o faamatilatila mai e se aso faamanatu amioga lē taupulea ma lē māmā?

   Mataupu silisili: “Ua lava ia na taimi i aso ua mavae na outou faia ai le manaʻo o tagata o le lalolagi, o amioga matagā, ma le tuʻinanau, le inu tele i le uaina, ma patī lē taupulea, ma tauvaga o inuga ʻava, ma le ifo i tupua e inosia.”​—1 Peteru 4:3.

   E tusa ai ma lenei mataupu silisili, e ʻalofia e Molimau a Ieova aso faamanatu e onanā ai tagata ma faia patī e lē taupulea. E fiafia Molimau a Ieova e faifaimea faatasi ma a latou uō, ma e latou te ono filifili e inu ai se ʻava malosi, ae e latou te puleaina. E latou te taumafai malosi e mulimuli i fautuaga a le Tusi Paia e faapea: “Pe tou te aai, pe inu, pe faia se tasi mea, ia faia mea uma lava ina ia faamamaluina ai le Atua.”​—1 Korinito 10:31.

   O lea, e lē auai Molimau a Ieova i faafiafiaga po o aso faamanatu e faaauiluma ai amioga lē mamā lea e taʻusalaina e le Tusi Paia. E aofia ai foʻi le tausamiga a Iutaia e taʻua o le Purima. E ui ua leva ona faamanatu i le Purima le faasaʻoloto mai o tagata Iutaia i le senituri lona lima T.L.M., ae ua faamatalaina i le tusi Essential Judaism, i le taimi nei atonu “ua lē o toe mamalu ma ua faamatalaina ua fai e tagata Iutaia ma faaataga o le aso faamanatu o le Mardi Gras po o le Carnival, lea e aofia ai le faia o teuga (e masani ona oofu tamāloloa i ofu o fafine), amioga lē taupulea, onanā, ma pisapisaō.”

 Ioe. Talu ai o loo aʻoaʻoina i le Tusi Paia tagata ia alolofa ma faaaloalo i o latou tauaiga uma e tusa pe eseese o latou talitonuga. (1 Peteru 3:​1, 2, 7) O le mea moni, pe a lē toe auai se Molimau a Ieova i le faamanatuina o nisi o aso faamanatu, e ona lē fiafia, ma tigā ona tauaiga. O lea, o le toʻatele o Molimau a Ieova e taulamua e faamautinoa i o latou tauaiga e latou te alolofa iā i latou, faamatala atu ma le faautauta māfuaaga o a latou filifiliga, ma e latou te asiasi atu foʻi i o latou aiga i isi taimi.

 E leai. E latou te talitonu e tatau i tagata taʻitoʻatasi ona faia a latou lava filifiliga. (Iosua 24:15) E āva Molimau a Ieova i ituaiga uma o tagata e tusa pe eseese o latou talitonuga.​—1 Peteru 2:​17.