Leai. Talu ai o le tapuaʻi i le Atua o le filifiliga a le tagata lava ia. (Roma 14:12) E aʻoaʻo e Molimau a Ieova a latou fanau i mataupu silisili o le Tusi Paia, ae pe a matutua le fanau e tatau i le tagata lava ia ona filifili pe avea ma Molimau a Ieova.—Roma 12:2; Kalatia 6:5.

 E naunau mātua Molimau a Ieova i le mea e sili ona lelei mo a latou fanau, e pei o le toʻatele o isi mātua. E latou te aʻoaʻo a latou fanau i mea latou te manatu e aogā iā i latou, e pei o tomai aogā, tapulaa tauamio ma talitonuga faalelotu. E talitonu Molimau a Ieova, o loo aʻoaʻoina i le Tusi Paia le auala sili e ola ai. O le māfuaaga lea e latou te taumafai ai e aʻoaʻo a latou fanau i nei tapulaa, e ala i le suʻesuʻeina o le Tusi Paia ma i latou ma auai faatasi i sauniga faa-Kerisiano. (Teuteronome 6:6, 7) Pe a matutua le fanau, o le a faia e le tagata lava ia lana filifiliga pe auai i le tapuaʻiga a ona mātua, e fua i mea ua ia aʻoaʻoina.

•  Pe e papatiso e Molimau a Ieova pepe?

•  Pe e taʻusalaina e Molimau a Ieova a latou fanau pe a filifili e lē papatiso?

•  Aiseā e ave ai e Molimau a Ieova a latou fanau i le talaʻiga?

•  Pe e auai Molimau a Ieova i aso faamanatu?

•  O ā faalogona o i latou na ola aʻe o ni Molimau a Ieova?

 Leai. E lē o aʻoaʻoina i le Tusi Paia le papatisoina o pepe. O se faataʻitaʻiga, a o leʻi papatisoina Kerisiano i le uluaʻi senituri, na latou faalogo muamua i le feʻau, “talia ma le lotoatoa,” ma faaalia le salamo. (Galuega 2:14, 22, 38, 41) O lea, ina ia papatisoina se tasi, e manaʻomia ona malamalama lelei i aʻoaʻoga o le Tusi Paia, talitonu i ai, ma filifili e ola e tusa ma na aʻoaʻoga. O mea na e lē mafai ona faia e se pepe.

 A o tuputupu aʻe se tamaitiiti, e ono iai le taimi e filifili ai e papatiso. Ae ina ia faia faapea, e tatau ona latou malamalama i le tautoga ua latou faia.

 Leai. E ui e faanoanoa mātua Molimau pe a lē auai le fanau i le latou tapuaʻiga, ae e latou te alolofa pea iā i latou ma e lē avea lenā ma mea e motusia ai le latou faiā.

 E tele māfuaaga e matou te faaaofia ai a matou fanau i le talaʻiga. a

•   Ua faatonuina e le Tusi Paia mātua e aʻoaʻo a latou fanau e faatatau i le Atua ma toleni i latou e tapuaʻi iā te ia. (Efeso 6:4) Talu ai o le tapuaʻiga e aofia ai le faailoa atu o le faatuatua o se tasi i le lautele, o le talaʻiga la o se vala tāua e aʻoaʻo ai fanau e faatatau i le Atua.—Roma 10:9, 10; Eperu 13:15.

•   O loo faalaeiau e le Tusi Paia fanau ia “vivii atu i le suafa o le ALII.” (Salamo 148:12, 13, Tusi Paia Samoa—Lomiga 1969) O se tasi o auala tāua e vivii ai i le Atua, o le talanoa lea i isi e faatatau iā te ia. b

•   Ua tele aogā ua maua e fanau ona o le talaʻi faatasi ma o latou mātua. O se faataʻitaʻiga, ua latou aʻoaʻoina le auala e feutagaʻi ai ma tagata eseese ma atiaʻe uiga tāua e pei o le tigā alofa, agalelei, faaaloalo, ma le lē manatu faapito. E fesoasoani foʻi iā i latou e malamalama atili ai i le māfuaaga o lo latou faatuatua.

 E lē auai Molimau a Ieova i aso faamanatu faalelotu po o isi aso faamanatu e lē faafiafiaina ai le Atua. c (2 Korinito 6:14-17; Efeso 5:10) Mo se faataʻitaʻiga, e matou te lē auai i aso fanau po o le faamanatuina o le Kerisimasi lea e leai ni faavae faa-Kerisiano.

 I le taimi e tasi, e matou te fiafia e faifaimea faatasi ma aiga ma avatu meaalofa i a matou fanau. Nai lo o le faatasitasi ma aiga ma avatu meaalofa i ni taimi patino, e matou te faia faapea a o faagasolo le tausaga.