Ua faaaogā e Molimau a Ieova le tele o faaliliuga eseese i a latou suʻesuʻega o le Tusi Paia. Peitaʻi, e matou te matuā talisapaia le O le Tusi Paia—O le Faaliliuga a le Lalolagi Fou lea e maua i isi gagana, ona e faaaogā ai le suafa o le Atua, e saʻo aʻiaʻi, ma e manino.

•   Le faaaogāina o le suafa o le Atua. Na lē taulau isi na lomiaina le Tusi Paia i le faamamaluina o le Tusitala o le Tusi Paia. O se faataʻitaʻiga, i se tasi o faaliliuga o le Tusi Paia, o loo lisiina ai igoa e silia i le 70 o i latou na faia se sao i le lomiaina o le Tusi Paia. Peitaʻi, ua aveesea i le Tusi Paia lava lea le suafa o Lē na tusia, o Ieova le Atua.

   I se faaeseesega, ua toe faafoʻisia e le Faaliliuga a le Lalolagi Fou le suafa o le Atua i vaega sa iai i uluaʻi tusitusiga o le Tusi Paia. I le taimi e tasi, e lē o faailoa mai lava suafa o i latou i le komiti na faaliliuina le Tusi Paia.

•   Saʻo aʻiaʻi. E lē o faaliliuga uma e saʻo aʻiaʻi le auala e faaliliuina ai le feʻau autū o le Tusi Paia. O se faataʻitaʻiga, i se tasi o faaliliuga, ua faaupu ai le Mataio 7:​13 e faapea: “Ia outou ulu atu i le faitotoʻa vaitiiti, auā o le faitotoʻa i seoli e va tele ma e faigofie le auala.” Peitaʻi, na faaaogā i uluaʻi tusitusiga le upu “faaumatiaga,” ae lē o “seoli.” Atonu na faaaogā e le ʻaufaaliliu le upu “seoli” ona na latou manatu o le a faapuapuagatia e faavavau tagata leaga i le afi i seoli. Ae e lē o lagolagoina i le Tusi Paia lenā manatu. O lea, ua faaliliuina ai ma le saʻo aʻiaʻi e le Faaliliuga a le Lalolagi Fou lenā mau e faapea: “Ia outou ulu atu i le faitotoʻa vaitiiti, auā e vatele ma lautele le auala e tau atu i le faaumatiaga.”

•   Manino. O se faaliliuga lelei, e lē na o le saʻo aʻiaʻi ae e tatau foʻi ona manino ma ia faigofie ona malamalama. Seʻi mātau se faaaʻoaʻoga. I le Roma 12:11, na faaaogā ai e le aposetolo o Paulo se faaupuga o lona uiga moni lava, “i le agaga ua pupuna.” Talu ai e faigatā ona malamalama i lenā faaupuga pe a tuu mai i le gagana faa-Peretania i aso nei, ua faaliliuina ai e le Faaliliuga a le Lalolagi Fou lenā faaupuga i se auala e faigofie ona malamalama ai. Ua taʻua ai e tatau i Kerisiano ona “maelega i la le agaga.”

 E lē gata e faaaogā i le Tusi Paia le suafa o le Atua, e saʻo aʻiaʻi, ma e manino, ae e iai foʻi se isi vala e matilatila ai le Faaliliuga a le Lalolagi Fou: E tufa fua e leai se tau. O lea, e faitau miliona i latou ua mafai ona faitau i le Tusi Paia i a latou lava gagana, e oo lava iā i latou e lē mafai ona faatauina mai se Tusi Paia.