O le Tusi Paia, o le faavae autū lea o o matou talitonuga. O lea, e fetuunaʻi ai o matou talitonuga, a o faateleina lo matou malamalama i mau o le Tusi Paia. a

 O na suiga e ōgatusa ma le mataupu silisili o le Tusi Paia o loo i le Faataoto 4:​18: “Ae o le ala o ē e amiotonu ua pei o le susulu o le malamalama o le taeao lea e tupu pea lona malamalama seʻia oo ina matuā ao lelei le aso.” E pei lava ona faasolosolo ona iloa lelei atu mea i se fanua a o oso aʻe le lā, e faasolosolo foʻi ona aumai e le Atua le malamalama i upu moni o le Tusi Paia, i lana taimi atofaina. (1 Peteru 1:​10-​12) E pei ona valoia i le Tusi Paia, ua ia faatuputeleina lenā mea a o faagasolo “taimi o le iʻuga.”​—Tanielu 12:4.

 E lē faateʻia i matou pe lagona le lē fiafia i nei fetuunaʻiga i lo matou malamalamaga. E iai foʻi tagata tapuaʻi o le Atua i aso anamua na sesē o latou manatu ma mea na latou faatalitalia, ma na manaʻomia ai ona toe fetuunaʻi.

•   Na ofo atu e Mose o ia lava e fai ma faaola mo le nuu o Isaraelu, a o leʻi oo i le taimi atofaina a le Atua i le 40 tausaga mulimuli ane.​—Galuega 7:​23-​25, 30, 35.

•   E leʻi malamalama le ʻauaposetolo i le valoaga e faatatau i le maliu ma le toetū o le Mesia.​—Isaia 53:​8-​12; Mataio 16:21-​23.

•   Na sesē manatu o nisi Kerisiano i le uluaʻi senituri e faatatau i le taimi e oo mai ai “le aso o Ieova.”​—2 Tesalonia 2:​1, 2.

 Na faasaʻo e le Atua o latou manatu i se taimi mulimuli ane, ma e matou te tatalo o le a faaauau foʻi ona ia faia faapea mo i matou.​—Iakopo 1:5.