Leai. E lē teena e Molimau a Ieova le faia o tui puipui. E matou te vaai i le faia o tui puipui o le filifiliga saʻoloto a le tagata lava ia. E toʻatele Molimau a Ieova ua filifili e fai a latou tui puipui.

 E matou te saʻilia togafitiga faafomaʻi e sili ona lelei, ma e matou te talisapaia le tele o togafitiga ua maua e faaitiitia ai le aafia i faamaʻi tugā. E matou te talisapaia tele galuega a fomaʻi ma tausimaʻi ma i latou uma o loo lagolagoina galuega a le soifua mālōlōina, aemaise i taimi o faamaʻi ma faalavelave faafuaseʻi.

 E galulue faatasi Molimau a Ieova ma tagata aloaʻia o le soifua mālōlōina. O se faataʻitaʻiga, ina ua pipisi le KOVITI-19, na faaauau pea ona saunia e Molimau a Ieova ni faamanatu i lenei upega tafaʻilagi i le faitau selau o gagana, e faalaeiau ai tagata ina ia usitaʻia taʻiala ua saunia e faigāmalo mo le saogalemu. Na aofia ai i nei faamanatu le tausisia o le vā faatulagaina, usitaʻia tulafono mo faatasitasiga i le lautele, faanofoesea, fufulu mamā o lima, faia o tali fofoga ma isi mea e faatonuina ma fautuaina e faigāmalo.—Roma 13:1, 2.

 Mo le tele o tausaga, na faamatilatila i lomiga a Molimau a Ieova mataupu silisili nei:

•   O filifiliga mo le soifua mālōlōina e fitoitonu i le tagata lava ia.—Kalatia 6:5.

   “E lē fautuaina e lenei mekasini se togafitiga patino po o se ituaiga patino o vailaau faafomaʻi. O le sini o lenei mekasini, o le faailoa atu o mea moni ma tuu i le tagata e fai lana ia lava filifiliga.”—Awake!, February 8, 1987.

   “O le filifiliga e talia pe teena le faia o tui puipui mo oe ma lau fanau, e patino i le tagata lava ia.”—Awake!, August 22, 1965.

•   E matou te saʻilia togafitiga faafomaʻi ona e matou te faatāuaina le ola.—Galuega 17:28.

   “E faaaogā tatau e Molimau a Ieova tomai faafomaʻi e fesoasoani i o latou faafitauli tau soifua mālōlōina. E latou te manumanu i le ola ma faia taumafaiga uma e talafeagai ma tapulaa faale-Tusi Paia ina ia ola ai pea.”—The Watchtower, July 1, 1975.

   “E talia ma le fiafia e Molimau a Ieova vailaau ma togafitiga faafomaʻi. E latou te mananaʻo ia tumau le soifua mālōlōina lelei ma umi le ola. O nisi Molimau a Ieova o ni fomaʻi, e pei foʻi o le Kerisiano o Luka i le uluaʻi senituri. . . . E talisapaia e Molimau a Ieova galuega fitā ma le faataulagaina a ē o loo saunia tausiga faafomaʻi. E latou te matuā lotofaafetai foʻi i le mapusaga mai i maʻi, lea e saunia mai e na tagata.”—Le Olomatamata, Fepuari 1, 2011.