E mulimuli Molimau a Ieova i le fautuaga a le Tusi Paia, e aua le tali atu i tuuaʻiga ma tauemuga uma. O se faataʻitaʻiga, ua faapea mai se faataoto i le Tusi Paia: “O lē e faasaʻo i le tagata tauemu, e oo iā te ia le faalumaina.” (Faataoto 9:​7, 8; 26:4) Nai lo o lo matou aafia i ni fefinauaʻiga ona o le soona popole i ni tuuaʻiga sesē, e matou te taulaʻi atu i le faafiafiaina o le finagalo o le Atua.​—Salamo 119:69.

 Peitaʻi, e iai “le taimi e filemu ai ma le taimi e tautala ai.” (Failauga 3:7) E matou te tali atu i tagata o loo fia iloa moni faamatalaga moni, ae e matou te ʻalofia le aafia ai i ni fefinauaʻiga e leai se uiga. O le mea lea e matou te mulimuli ai i aʻoaʻoga ma faaaʻoaʻoga a Iesu ma uluaʻi Kerisiano.

•   E leʻi tali atu Iesu ina ua tuuaʻia sesē o ia a o tulaʻi i luma o Pilato. (Mataio 27:11-​14; 1 Peteru 2:​21-​23) E leʻi tali atu foʻi Iesu ina ua tuuaʻia o ia o se tagata ʻai tele ma le inu tele i le uaina. Nai lo o lea, na ia tuu atu le avanoa ina ia iloa ai lava e isi le manatu saʻo, e ala i ana gaoioiga. E ōgatusa lenā ma le mataupu silisili: “E taʻuamiotonuina le atamai i ana galuega.” (Mataio 11:19) Ae ina ua tulaʻi mai nisi o tulaga ua tatau ai ona fai atu se tali, ona tali atu loa lea o Iesu ma le lototele i ē na taʻuleagaina o ia.​—Mataio 15:​1-3; Mareko 3:​22-​30.

   Na aʻoaʻo e Iesu ona soo ina ia aua le lotovaivai pe a tuuaʻia sesē i latou. Na ia fetalai: “E fiafia outou pe a upuleagaina, sauāina, ma tuuaʻia pepelo outou i mea leaga uma ona o aʻu.” (Mataio 5:​11, 12) Peitaʻi, na fetalai foʻi Iesu, pe a avea na tuuaʻiga ma avanoa e mafai ona avatu ai se molimau, o le a ia faataunuu lana folafolaga: “Ou te tuuina atu upu ma le atamai i o outou gutu, e lē mafai ai e ē e faasagatau ona tetee pe e finau mai.”​—Luka 21:12-​15.

•   Na fautua atu le aposetolo o Paulo i Kerisiano ina ia ʻalofia fefinauaʻiga e leai se uiga ma tagata tetee, ma na ia faamatalaina na ituaiga o finauga e “leai se mea e maua ai ma e iʻuvale foʻi.”​—Tito 3:9; Roma 16:17, 18.

•   Na faalaeiau e le aposetolo o Peteru Kerisiano ina ia tali atu e puipuia lo latou faatuatua pe a talafeagai. (1 Peteru 3:​15) Peitaʻi, na ia iloa e sili atu le faia faapea e ala i gaoioiga nai lo o upu e faia atu. Na ia tusi: “O le faia o mea lelei, ua outou pupuni ai gutu o tagata lē mafaufau mai i le faia o tala valea.”​—1 Peteru 2:​12-​15.