I le Aso Sa, Ianuari 5, 2014, a o malaga atu Serge Gerardin i se pasi e aga‘i atu i se fonotaga a Molimau a Ieova na faia e lata i Paris, i Falani, ae ia vaaia loa se faalavelave faafuase‘i mata‘utia. Na ia faapea mai: “Na alu atu le taavale so‘a le pā simā o loo puipui ai le auala laupapa, lelea i luga o le ea le taavale, ma alu ifo loa taliaga i luga o le auala laupapa ma ua sasao mai ai se afi.”

E silia ma le 40 tausaga o galue Serge o se tagata fuimū, ma talu ai o ia o se ta‘ita‘i o le ‘aufuimū, o lea na vave ai lava ona ia gaoioi. Na ia ta‘ua: “E ui sa alu le matou pasi i le isi itu o le auala, ae na ou fai i le avepasi e taofi le pasi, ma ou tamo‘e atu loa i le mea o loo mū mai ai le taavale.” Na lagona atu e Serge se tasi o ee “Ta fia ola! Ta fia ola!” Na fai mai Serge: “E ui sa fai lo‘u peleue ma le fusiua, ma e le‘i iai ni a‘u meafaigaluega mo le saogalemu, ae o le faalogo atu i le alaga a le tagata na ou iloa ai, e iai tagata e tatau ona faasaoina.”

A o faataamilo Serge i le taavale, na ia vaaia ai se tagata o loo tau tifa tifa mai ma ia ta‘ita‘ia ese atu loa i se mea saogalemu. Na ta‘ua e Serge: “Na ta‘u mai e lenei tagata e iai isi e to‘alua o loo i totonu o le taavale. O le taimi lea ua tele taavale ua tutū mai, ae e leai se tagata na mafai ona latalata mai i le taavale, ona o le aasa ma le sasao o le afi.”

Na ō mai nisi o ave loli ma a latou fagu tinei mū, ma na faatonuina i latou e Serge e faga ai le taavale, ma pē ai le afi mo sina taimi. Peita‘i, na taomia le avetaavale i lalo o le taavale, o lea na sii ese ai e Serge ma nisi o tagata le taavale, ae aveese mai ma le saogalemu le avetaavale.

Na fai mai Serge: “O le taimi lea na faafuase‘i ai ona toe sasao a‘e ai le afi mai i le taavale!” Peita‘i o loo iai pea se isi tagata i totonu o le taavale, o loo mau pea lona fusipa‘u ma o loo ū i lalo lona ulu. E le‘i umi ae taunuu ane se isi fo‘i tagata fuimū e lē o faigaluega ma o loo fai ni ona ofu toleni. Na ta‘ua e Serge: “Na ou faamatala atu i ai ua toeitiiti a pā le taavale, o lea na matou filifili ai e uu lima o le tagata o loo i totonu ma toso mai i fafo.” E le‘i atoa se minute talu ona latou faia faapea, ae pā loa ma le taavale.

Ina ua taunuu ane le ‘aufuimū ma foma‘i, na latou tapē loa le afi ma togafitia i latou na aafia. Sa togafitia fo‘i lima o Serge ona sa lavelavea ma na mū fo‘i i le afi. A o toe fo‘i atu Serge i le pasi e alu i le fonotaga, na tamomo‘e atu nisi o tamāloloa ma faafetai atu iā te ia.

E lotofaafetai Serge ona sa mafai ona ia ofo atu le fesoasoani. “Na ou lagona o lo‘u tiute tauave i luma o lo‘u Atua o Ieova le faasaoina o ola o na tagata. Ou te matuā fiafia ona sa mafai ona ou fesoasoani e lavea‘ia na tagata.”