O loo iai i le ogatotonu o le vaomatua o le Amasone se Maota Fono fou telē a Molimau a Ieova. O lenei fanua e 128 eka lona telē, e i le itu i mātū o le aai o Manaus i Pasili, ma o le tele o ona vaega e lilofia i le vaomatua. E faalogoina le fetagisi o koke, toucans ma isi manufelelei mai i tumutumu o laau o le cupuaçu, o se laau telē i Pasili e iai ni ona fatu, ma laau e taʻu o le angelim pedra. Aiseā ua fausia ai se Maota Fono i lea vaipanoa?

O le aai o Manaus e i le 1,450 kilomita (900 maila) mai i le gutu o le vaitafe o le Amasone, ma e toetoe lua miliona tagata e nonofo ai. O lenei maota fou o le a faaaogā e Molimau a Ieova e pe ā ma le 7,000 mai i Manaus ma aai e lata ane, e aofia ai nuu e i le Amasone ma ona alāvai. O le aai e aupito i mamao, o São Gabriel da Cachoeira, e i le silia i le 800 kilomita (500 maila) le mamao i le itu i sisifo o Manaus. O nisi Molimau a Ieova e faimalaga i vaa mo le tolu aso ina ia auai i se fonotaga po o se tauaofiaga e faia i lenei Maota Fono.

O se galuega fitā le fausia o le Maota Fono i le ogatotonu o le Amasone. Sa aofia ai le laʻuina atu i vaa o pusa tetele e 13 o loo iai mea e fau ai le maota, mai i le uafu i Santos, São Paulo; faasolo atu i le talafatai o Pasili, ona oo atu lea i le vaitafe o le Amasone ina ia taunuu i le nofoaga na faia ai le galuega.

O lenei maota fou ua atoa i ai le 27 o Maota Fono ua fausia i Pasili, ma e 1,956 ē na auai i le sauniga o le tuuina atu o le maota, i le Aso Sa, Me 4, 2014. Sa matuā fiafia le toʻatele ona o le taimi muamua lea ua auai ai i se sauniga i se Maota Fono.

E lē gata na mafai ona faalogo le aofia i le failauga ae na vāai foʻi iā te ia. O se suiga mataʻina tele lea mai i le mea sa iai, auā sa faia fonotaga ma tauaofiaga i nofoaga faitele, ma e lē iloa atu e le toʻatele le pulelaa po o le failauga. Na faapea mai se tasi Molimau a Ieova: “E tele tausaga o oʻu auai i tauaofiaga, ae ou te leʻi vaaitino lava i se tala faatino faale-Tusi Paia; e na o loʻu faalogologo lava i ai.” Ae o lea ua mafai e tagata uma ona iloa atu le pulelaa.