E faitau afe tagata na asiasi atu i le 2014 i le International Fair i Rouen, i le itu i mātū o Falani, ma na tosina la latou vaai i se faaaliga na faamatilatila ai le matua e faapea, “The Bible—Yesterday, Today, and Tomorrow.”

Sa iai i lenei faaaliga ni TV tetele sa faaalia ai ni vitiō e faatatau i manusikulipi anamua o le Tusi Paia, ma na tosina mai i ai le to‘atele o tagata. Ina ua ō mai tagata e matamata i lenei faaaliga, sa latou a‘oa‘oina atili ai e faatatau i fautuaga aogā o loo i le Tusi Paia, le sa‘o a‘ia‘i o talafaasolopito ma manatu faasaienisi o loo iai, aemaise le tele o kopi o le Tusi Paia ua mafai ona tufatufaina atu.

Na faaalia ai fo‘i le auala na faasaoina mai ai le Tusi Paia i le tele o tausaga, ma ua mafai nei e le faitau piliona o tagata ona faitau i ai i kopi ua lomia, pe e ala fo‘i i se masini faaonapōnei. Na maua fua ai fo‘i e tagata ni kopi O le Tusi Paia—O le Faaliliuga a le Lalolagi Fou, lea ua lomia e Molimau a Ieova i le silia ma le 120 gagana.

E to‘atele tagata na asiasi ane, na faaalia lo latou lotofaafetai i taumafaiga na taulamua ai Molimau a Ieova, ina ia mafai ona maua e tagata lautele le Tusi Paia. A o tutū faatasi se fafine e galue mo le lelei o talavou ma se vaega o tamaiti talavou, na faapea mai o ia: “O le Tusi Paia o se vaega o lo tatou tofi tuufaasolo. E matuā aogā lava, ma o taimi uma ou te faitau i ai, e maua ai tali o o‘u faafitauli.”

Na faate‘ia se tinā matua e 60 tausaga ina ua ia iloa e mafai ona ave fua sana Tusi Paia. Na ia faapea mai: ‘E tatau ona toe amata ona tatou faitau i le Tusi Paia auā e tatou te mana‘omia uma lava.’