Iā Oketopa 9, 2022, e toʻa 1,394 na auai i Maota mo Sauniga, ina ua tatalaina e Geoffrey Jackson o se sui o le Vaega Pule o Molimau a Ieova le toe teuteuga O le Tusi Paia—O le Faaliliuga a le Lalolagi Fou i le gagana Samoa.

Na muamua maua e Molimau a Ieova e tautatala i le gagana Samoa le Tusi Paia atoa O le Faaliliuga a le Lalolagi Fou i la latou gagana i le 2009. a E 36,610 kopi O le Faaliliuga a le Lalolagi Fou ua lomia i le gagana Samoa ma ua faaaogāina e le silia i le 1,700 Molimau a Ieova i le lalolagi aoao e tautatala i lenā gagana. Aiseā ua toe teuteuina ai lenei faaliliuga o le Tusi Paia? O ai na saunia lenei faaliliuga? E faapefea ona e mautinoa e maufaatuatuaina le toe teuteuga O le Faaliliuga a le Lalolagi Fou? O ā vala o lenei toe teuteuga o le a fesoasoani iā te oe ina ia ‘e matuā agavaa ai e lava saunia mo galuega lelei uma’?​—2 Timoteo 3:​16, 17.

Talu ai e sui le gagana a o faagasolo tausaga, o lea, e talafeagai ai ona toe teuteu le faaliliuga o le Tusi Paia ina ia faigofie ona malamalama ai tagata. E itiiti le aogā o se Tusi Paia e tusia i se gagana e lē o toe tautatala ai tagata.

Na tusia e Ieova mai lava i le amataga tusi taʻitasi o le Tusi Paia i se gagana e masani ai tagata ma malamalama ai. O le auala foʻi lenā na mulimuli ai le Komiti o le Faaliliuga o le Tusi Paia o le Lalolagi Fou ina ua tatala le toe teuteuina O le Faaliliuga a le Lalolagi Fou iā Oketopa 2013. Ua taʻua i upu tomua o lenei lomiga: “O lo matou sini o le faia o se faaliliuga e lē gata e tausisi i uluaʻi tusitusiga o le Tusi Paia ae ia manino ma malamalamagofie.”

O le uluaʻi faaliliuga o le Tusi Paia a le Lalolagi Fou i le gagana Samoa na faaliliu mai i le Tusi Paia faa-Peretania o le New World Translation of the Holy Scriptures​—With References o le 1984. O le toe teuteuina o le Tusi Paia i le gagana Samoa, o loo aofia ai le tele o teuteuga fou o loo i le Tusi Paia faa-Peretania, ma ua tuu i ai suiga fou i le gagana Samoa ina ia malamalamagofie ai tagata faitau.

E lē gata i lea, talu ona tatalaina le uluaʻi Faaliliuga a le Lalolagi Fou i le faa-Peretania, ua agaʻigaʻi i luma le malamalamaga i le gagana Eperu, gagana Arama ma le gagana Eleni lea na uluaʻi tusia ai le Tusi Paia. Na maua le tele o manusikulipi o le Tusi Paia lea e leʻi iai i le taimi na uluaʻi faaliliu ai le Faaliliuga a le Lalolagi Fou i le gagana Peretania. Ua fesoasoani nei manusikulipi i le ʻaufaaliliu o le Tusi Paia, e iloilo ai uiga saʻo o upu i uluaʻi gagana na tusia ai le Tusi Paia.

O lea, ua toe teuteu ai faaupuga o mau ina ia faaaofia ai manatu ua māfuli i ai tagata atamamai o le faauigaga e sili ona saʻo o uluaʻi tusitusiga. O se faataʻitaʻiga, e tusa ai ma isi manusikulipi, o loo faapea mai le Mataio 7:13: “Ia outou ulu atu i le faitotoʻa vāitiiti, auā e vātele le faitotoʻa ma lautele le auala e tau atu i le faaumatiaga.” I faaliliuga muamua O le Faaliliuga a le Lalolagi Fou, e leʻi aofia ai le faaupuga “le faitotoʻa.” Peitaʻi, ina ua suʻesuʻe atili atu na manusikulipi na iloa ai o le faaupuga “le faitotoʻa” na iai i le uluaʻi tusitusiga o le Tusi Paia. O lea la, na faaaofia ai lenā faaupuga i le toe teuteuga o le Tusi Paia. E tele foʻi isi toe teuteuga. Peitaʻi, o na teuteuga ua na o ni nai suiga lāiti, ma e lē o suia ai le uiga o le feʻau autū o le Afioga a le Atua.

Na iloa mai i nisi suʻesuʻega, e ono isi mau o le Tusi Paia sa tatau ona iai le suafa o Ieova. O nei mau e maua i tusi o Faamasino 19:18; 1 Samuelu 2:​25; 6:3; 10:26; 23:14, 16. I le taimi nei, O le Faaliliuga a le Lalolagi Fou i le faa-Peretania e 7,216 taimi o loo tusia ai le suafa o Ieova, e aofia ai le 237 taimi o loo tusia ai i Tusitusiga Paia Eleni.

O le Faaliliuga a le Lalolagi Fou na lomia e le Watch Tower Bible and Tract Society, o le faalapotopotoga faaletulafono o loo fai ma sui o Molimau a Ieova. Ua silia ma le 100 tausaga o tufatufaina atu e Molimau a Ieova Tusi Paia i le lalolagi aoao. O le uluaʻi Faaliliuga a le Lalolagi Fou i le gagana Peretania, na tatalaina e le Komiti o le Faaliliuga o le Tusi Paia o le Lalolagi Fou mai i le vaitausaga o le 1950 seʻia oo i le 1960. E leʻi saʻilia e lenei komiti ni tulaga taualoa, ma na latou mananaʻo e aua le faailoaina o latou igoa e tusa pe maliliu.​—1 Korinito 10:31.

I le 2008, na tofia ai e le Vaega Pule o Molimau a Ieova ni uso e faia aʻe ai le Komiti o le Faaliliuga o le Tusi Paia o le Lalolagi Fou. Na vave lava ona galulue lenei komiti e toe teuteu le Tusi Paia faa-Peretania, ma na iloiloina le tele o suiga i le gagana Peretania talu ona tatala le uluaʻi Faaliliuga o le Lalolagi Fou i lenā gagana. Na latou iloilo lelei foʻi le silia ma le 70,000 tali na tuuina atu i le ʻaufaaliliu O le Tusi Paia—O le Faaliliuga a le Lalolagi Fou i le silia ma le 120 gagana.

Muamua, e tofia se vaega o Kerisiano e galulue i le faaliliuga. Ua iloa o le galulue faatasi o tagata faaliliu o se vaega, nai lo o le galue o le tagata lava ia, e maua ai se faaliliuga e sili ona lelei ma talafeagai. (Faataoto 11:14) E masani lava, o na tagata faaliliu ua iai le poto masani i le faaliliuina o lomiga a Molimau a Ieova. Ae e toleni māeʻaeʻa i latou i taʻiala tāua o le faaliliuina o le Tusi Paia, ma le faaaogāina o polokalame faapitoa i komepiuta.

E faaaogā e le ʻaufaaliliu se auala e faaliliu ai le Tusi Paia lea e tuufaatasi ai upu mai i le Tusi Paia ma se polokalame faakomepiuta. E fesoasoani le matagaluega e taʻua o le Vaega mo Faaliliuga lea e i Niu Ioka i le ʻaufaaliliu. E vaavaai totoʻa e le Vaega Pule o Molimau a Ieova le galuega o le faaliliuga o le Tusi Paia, e ala i le Komiti o Tusitusiga. Ae e faapefea ona faia lenei galuega?

Na faatonuina le ʻaufaaliliu ina ia maua se faaliliuga o le Tusi Paia (1) ia saʻo lelei ma faigofie ona malamalama ai tagata lautele, (2) ia lē feteenaʻi manatu ma le (3) ia faaliliu i le upu i le upu pe a talafeagai ma le gagana o loo faaliliuina ai. Na faapefea ona ausia na sini? Seʻi manatu i le Tusi Paia lea faatoʻā tatala. Na amata ona galulue le ʻaufaaliliu i le toe iloiloina o faaliliuga o le Tusi Paia a le Lalolagi Fou na iai muamua. O le polokalame faakomepiuta e taʻua o le Watchtower Translation System e faailoa mai ai upu talitutusa po o upu e fesootaʻi atu i upu i le Tusi Paia. O loo faaalia ai foʻi i lenā polokalame uluaʻi upu i le gagana Eleni ma le gagana Eperu, ina ia iloilo ai e le ʻaufaaliliu le auala na faaliliuina ai nei upu i le gagana Eleni po o le gagana Eperu i isi mau. Na fesoasoani tele na sauniuniga i le toe iloiloina o upu e tutusa uiga i le gagana Samoa. E lē gata i lea, na taumafai foʻi le ʻaufaaliliu e faaaogā upu masani ma upu talitutusa e faigofie ona malamalama ai i le gagana Samoa a o latou iloiloina fuaiupu taʻitasi.

E manino mai, e tele atu mea e aofia ai i le faaliliuina o le Tusi Paia nai lo o le tau ina suia o faaupuga. E tele galuega na alu ai ina ia faamautinoa e saʻo le faaliliuina i le gagana Samoa o manatu faale-Tusi Paia e tusa ai ma o latou siʻomaga. E lē tau faamatalaina le faigatā o lenei galuega. O le toe teuteuga O le Tusi Paia—O le Faaliliuga a le Lalolagi Fou i le gagana Samoa ua faaliliuina ai le Afioga a le Atua i se auala e lē gata e tausisi i uluaʻi tusitusiga o le Tusi Paia, ae e manino ma malamalamagofie.

E matou te faalaeiauina oe ia suʻesuʻe le Tusi Paia—O le Faaliliuga a le Lalolagi Fou. E mafai ona e faitau i ai i luga o le Initaneti, JW Library, pe maua foʻi sau kopi ua lolomiina mai i se faapotopotoga o Molimau a Ieova. E mafai ona e faitau ma le mautinoa, ona ua saʻo ona faaliliuina fetalaiga a le Atua i lau lava gagana.

Faaopoopoga E: O loo aofia ai faafanua ma siata felanulanuaʻi e 15