Na toe fo‘i Zarina mai i Rusia i lona aiga i Asia tutotonu ina ua mae‘a ona papatiso o se tasi o Molimau a Ieova. Na maumaua‘i o ia e tausia a‘e lana fanau teine e to‘alua i ona talitonuga. Ae ona o le utiuti o lana faasoa, na latou nonofo faatasi ai i se fale e tasi le potu ma ona mātua, faatasi ai ma lona tuagane ma lona to‘alua. Na faatonuina o ia e ona mātua e aua ne‘i a‘oa‘oina lana fanau i upu moni o le Tusi Paia. Na faatonu fo‘i e mātua o Zarina lana fanau teine e aua neʻi talanoa ma lo la tinā e faatatau i le Tusi Paia.

 Na mafaufau loloto Zarina i se auala e a‘oa‘o ai lana fanau e faatatau iā Ieova. (Faataoto 1:8) O lea la, na ia tatalo faatauanau ai iā Ieova mo lana ta‘ita‘iga ma le atamai. Na gaoioi Zarina e tusa ai ma ana tatalo, na fai ma a latou masani le savalivali ma lana fanau teine ma talatalanoa i ai e faatatau i le matagofie o le foafoaga. Na fesoasoani na savalivaliga pupu‘u i lana fanau teine e atia‘e ai se faiā ma Lē na foafoaina mea.

 Na fuafua fo‘i e Zarina se isi auala e a‘oa‘o atili ai lana fanau e ala i le faaaogā o le tusi O ā Aʻoaʻoga Moni a le Tusi Paia? a Na tusia e Zarina palakalafa ma fesili mai le tusi i se fasi pepa. Na ia tusia foʻi ni faamatalaga faaoopopo e fesoasoani i lana fanau teine e malamalama lelei ai i le mataupu. E na te nanāina na fasi pepa faatasi ai ma se penitala i lalo o le masini tamea i le fale taʻele. Na faitau e lana fanau teine palakalafa ma tusi i lalo a la tali pe a ō i le potu.

 O lenā auala, na mafai ai ona suʻesuʻe e Zarina ma lana fanau teine mataupu e lua o le tusi Aʻoaʻoga Moni a o leʻi mauaina sa latou lava fale e nonofo ai. O inā na mafai ai e Zarina ona tausia aʻe lana fanau teine e aunoa ma ni faasāsāaga. Iā Oketopa 2016, na papatiso uma ai teine ma na la fiafia ona na faaaogā e lo la tinā le atamai ma le faautauta e fafagaina ai faaleagaga i laʻua.