O Artur o se ovasia o le matagaluega i Armenia, ma na ia asia se tasi o faapotopotoga a Molimau a Ieova. Na ia iloa ane e leʻi faataʻitaʻia lava e lenei faapotopotoga le talaʻiga i nofoaga faitele, lea e faaaogā ai fata tusi e iai lomiga faale-Tusi Paia. O lea, ina ia faalaeiau le faapotopotoga e faataʻitaʻi lea auala, na faatū ai e Artur ma lana avā, faatasi ma se isi uso e igoa iā Jirayr, se fata tusi i se tamaʻi aai. Na latou filifilia se vaega o le aai lea e tumutumu ai tagata.

 Na amata ona faaalia e tagata na pasi ane le fiafia ma ave lomiga. Peitaʻi e iai ni tagata tetee na mātauina foʻi lea auala fou e talaʻi ai, e pei o ni faifeʻau se toʻalua lea na afe ane i le fata tusi. Na kiki e se tasi o i laʻua le fata tusi ma pō le gutu o Artur, ma paʻū ai i lalo lana matatioata. Na taumafai Artur, Anna, ma Jirayr e faatoʻafilemu ia faifeʻau, ae e leʻi mafai. Na soli e nei faifeʻau le fata tusi ma tauʻai solo lomiga. Ina ua uma ona la palalauvale ma faafefe i latou, ona la ō ese loa lea.

 Mulimuli ane, na ō Artur, Anna, ma Jirayr i le ofisa o leoleo. Na latou faamatala le mea na tupu ma talaʻi atu mo sina taimi i nisi o leoleo sa iai. Ona ave lea o i latou i le ofisa o le leoleo sinia. I le taimi muamua, e na o le mea na tupu na fia iloa e le leoleo sinia. Ae ina ua ia iloa ane e leʻi toe tali atu Artur o se tagata e tino lelei ma malosi ina ua pō o ia e le faifeʻau, e leʻi toe talanoa loa i le mea na tupu, ae ua ia fia iloa e uiga i talitonuga o Molimau a Ieova. Na oo atu i le fā itula le umi o le latou talanoaga. O le ofo tele o lenei leoleo i le mea na tupu, na ia faapea atu ai: “Ese le manaia o le tou lotu! E tō loʻu pulou iā outou!”

 Ina ua toe fai le fata tusi a Artur i le aso na sosoo ai, na alu atu ai se tamāloa na mātauina le mea na tupu i le aso na muamua atu. Na faamālō le tamāloa iā Artur i le faaalia o uiga toʻafilemu ma le lē toe tauimasui atu. Na ia faapea atili mai, o le mea na tupu ua ia lē toe talitonuina ai se faifeʻau.

 I lenā afiafi, na toe aami mai ai e le leoleo sinia ia Artur e alu atu i le ofisa o leoleo. Ae nai lo o le toe talanoa i le mea na tupu, na ia fia iloa atili e uiga i le Tusi Paia, ma e toʻalua isi leoleo na iai i le latou talanoaga.

 I le aso na sosoo ai, na toe alu ai Artur i le ofisa o leoleo sinia e faaali ai nisi o a tatou vitiō faale-Tusi Paia. Na fai foʻi le leoleo sinia i isi leoleo e ō atu e matamata nei vitiō.

 O uiga lē lelei o nei faifeʻau, na mafai ai ona faalogo le toʻatele o leoleo mo le taimi muamua i le tala lelei. O le iʻuga, ua avatu ai se molimau lelei e uiga i Molimau a Ieova.