E nofo Maud i Falani, ma e faigaluega i se aʻoga lea e fesoasoani ai i tamaiti e iai aafiaga tumau o le tino, i taimi e fai ai a latou vasega. I se tasi aso, na talanoaina ai i se tasi o vasega le Fasiotiga Tagata a le ʻau Nasi ma a latou nofoaga o faasalaga. Na suʻi i ofu o pagota ni faailoga, ma o na faailoga na faia aʻe i ni fasi ʻieʻie. Na tofu le faailoga ma lona lanu, e iloa ai le māfuaaga na faafalepuipuiina ai se tasi.

 Ina ua talanoaina le tafatolu violē na iai i ofu o nisi o pagota, na faapea mai le faiaʻoga: “E pei uma lava o i latou o ni tagata tauatane.” Ina ua uma le vasega, na talanoa Maud i le faiaʻoga ma faamatala i ai na faaaogā e le ʻau Nasi le tafatolu violē, ina ia iloa ai Molimau a Ieova. a Na fai Maud i le faiaʻoga e mafai ona ia saunia mai nisi faamatalaga e faatatau i le mataupu. Na fiafia i ai le faiaʻoga, ma na talosaga iā Maud e faasoa atu na faamatalaga i le vasega.

 Ina ua talanoaina i se isi vasega lenei lava mataupu, na faaaogā ai e se isi faiaʻoga se siata o loo faamatala ai faailoga eseese na iai i ofu o pagota. Na faaalia manino i le siata, o le tafatolu violē na iloa ai Molimau a Ieova. Ina ua uma le vasega, na avatu e Maud i le faiaʻoga nisi faamatalaga e faatatau i le mataupu. Na talia e le faiaʻoga ma faia loa fuafuaga ina ia talanoa atu Maud i le vasega.

 Na tapena e Maud ni faamatalaga e talanoa atu ai i le vasega muamua mo le 15 minute, ae ina ua oo mai i le taimi o le vasega, na fai atu le faiaʻoga: “E mafai ona e faaaogā le itula atoa.” Na faaali e Maud se vitiō e faatatau i sauāga a le ʻau Nasi i Molimau a Ieova, ma ina ua taʻua i le vitiō e toʻa 800 ni tamaiti Molimau a Ieova na aveese e le ʻau Nasi mai i o latou mātua, na ia taofi le vitiō ma faitau ni mea na tutupu i nisi o na tamaiti e toʻatolu. Ina ua uma le vitiō, na faitau e Maud se tusi faamavae mai i le 1940, a se talavou Molimau a Ieova i Oseteria e 19 tausaga, e igoa iā Gerhard Steinacher, lea na tusi atu i ona mātua a o toeitiiti fasiotia e le ʻau Nasi. b

 Na faasoa atu foʻi e Maud nei lava faamatalaga i le vasega lona lua. O le lototele o Maud e faailoa atu nei faamatalaga, na mafai ai ona faamautinoa e nei faiaʻoga e toʻalua, e la te taʻua Molimau a Ieova pe a talanoaina i a la vasega tagata na sauāina i nofoaga o faasalaga a le ʻau Nasi.