A o faagasolo le faamaʻi o le KOVITI-19, na suia ai e uso ma tuafāfine le auala e faailoa atu ai i isi le feʻau faamāfanafanaloto mai i le Tusi Paia. Nai lo o le talaʻi i nofoaga faitele ma mai lea fale i lea fale, ua latou faaaogāina telefoni ma tusia tusi e faailoa atu ai lenei feʻau. a E toʻatele i latou na talisapaia nei taumafaiga ma na vaaia faamaoniga o le faamanuia a Ieova. (Faataoto 16:3, 4) Seʻi iloilo nisi o mea na tutupu i o tatou uso ma tuafāfine mai i isi atunuu.

 A o leʻi pepesi le faamaʻi, e masani ona asiasi Helen i se teine talavou ma ofo i ai se suʻesuʻega faale-Tusi Paia. Na teena e le teine le suʻesuʻeina o le Tusi Paia. Peitaʻi i le aso a o leʻi amata le vavao o le faamaʻi, na ave ai e Helen se Tusi Paia ma le tusi O ā Aʻoaʻoga Mai i le Tusi Paia? A o faagasolo le vavao, na toe ofo atu ai e Helen se suʻesuʻega faale-Tusi Paia ma faamatala atu e mafai ona fai le suʻesuʻega e faaaogā ai le telefoni. Na talia e le teine le faia o le suʻesuʻega ma na matuā fiafia lava i ai. E leʻi umi ae talosaga atu loa iā Helen e fai lana suʻesuʻega i aso uma. Na amata foʻi ona auai e lē aunoa i sauniga faa-Kerisiano e ala i le telefoni. E lē gata na ia faatatauina i lona olaga aʻoaʻoga a le Tusi Paia ae na ia faailoa atu foʻi i isi.

 Na tusia e Molimau i se tasi faapotopotoga ni tusi i leoleo, e faailoa atu ai lo latou talisapaia o le auaunaga tāua o loo faia e leoleo i lo latou vaipanoa. Na faateʻia leoleo i na tusi. Na faapea atu se leoleo i se toeaina o le faapotopotoga e igoa ia Jefferson, “Na ou faapea e tetee Molimau a Ieova i leoleo.” Na faamatala atu e Jefferson e lē moni lenā manatu. Na matuā fiafia leoleo i tusi, o lea na latou faapipiiina ai i le vaega e ulufale atu ai i le ofisa o leoleo. Na faapea mai se isi leoleo, “Atonu e fesoasoani nei tusi i isi ina ia talisapaia ai la matou auaunaga fitā.”

 O Edna ma Ednalyn o ni paeonia sauatoa. b E lē mafai ona la fesootaʻi i sauniga a le faapotopotoga ona e leai se Initaneti i le fale. O lea, na la talosaga ai i lo la tuaoi e lē o se Molimau pe mafai ona la faaaogāina lana Wi-Fi, ae fesoasoani i le totogiina o le Initaneti. Na malie i ai le fafine e la te faaaogā fua le Initaneti. Na auai le fafine i sauniga ina ua valaaulia o ia e Edna ma Ednalyn. I le taimi nei, ua auai e lē aunoa i sauniga ma suʻesuʻeina le Tusi Paia e lenā fafine, o lana tama tama, ma le fanau a lana fanau e toʻalua.

 Na valaaulia e uso ma tuafāfine o latou tuaoi, o ē latou te faigaluega faatasi ma isi e auai i se lauga lautele e faaaogā ai le Initaneti. I le taimi muamua, na faatalatū Ellaine e valaaulia tagata e latou te faigaluega faatasi i le falemaʻi i lenā vaipanoa. Na ia manatu e lē fiafia isi fomaʻi i Molimau. E ui i lea na lafo e Ellaine ni text e valaaulia ai fomaʻi. Ae na faatalatū pea Ellaine e valaaulia ni fomaʻi se toʻalua, o se ulugalii. Ina ua uma ona mafaufau ma tatalo Ellaine e faatatau i le ulugalii, na ia lafo loa i ai se valaaulia. Na faapea mai le avā a le fomaʻi: “O lona uiga e te manaʻo e avea aʻu ma Molimau a Ieova?” Na faamatala atu e Ellaine e mafai ona auai so o se tagata i le sauniga, ae e lē na o Molimau a Ieova. I le aso na sosoo ai, na faateʻia Ellaine ina ua vave auai le ulugalii i le sauniga! Na taʻua e Ellaine: “Na text mai le avā a le fomaʻi a o leʻi uma le sauniga ma faapea mai: ʻO le taimi muamua lenei ua ou auai ai i se sauniga a Molimau a Ieova. E ese le manaia ma ua ou matuā fiafia ai lava. Faafetai lava mo le valaaulia.’”

 E toʻa 20 fomaʻi na valaaulia e Ellaine i le sauniga, ma na matuā fiafia o ia ina ua auai le toʻa 16 o i latou. Na sii mai e Ellaine upu a le aposetolo o Paulo: “Ua ou matuā fiafia ina ua ou faaalia le ʻlototele’ e faasoa atu ai le ʻtala lelei a le Atua’ iā i latou matou te faigaluega faatasi.”—1 Tesalonia 2:2.

 Na matuā faigatā le tulaga o le faamaʻi i tagata uma. Peitaʻi, na faaauau pea ona olioli ma faatumauina se vaaiga saʻo e o tatou uso ma tuafāfine i lenā atunuu ma isi atunuu, e ala i le faia o mea uma e mafai e faamāfanafana ma fesoasoani ai i isi.—Galuega 20:35.