E nofo Bryn i North Carolina i le Iunaite Setete, ma o ia o se sui o Komiti mo Mataupu Tau Falemaʻi i lenā vaipanoa. E latou te galulue soosootauʻau ma falemaʻi i le vaavaaia o manaʻoga o maʻi a Molimau a Ieova.

 Talu ai ona o le faamaʻi o le KOVITI-19, e tele falemaʻi e latou te leʻi faatagaina le asiasi atu o tagata. Na vili Bryn i le tamāloa e faatulagaina le asiasi atu o faifeʻau i maʻi i se tasi o falemaʻi i lenā vaipanoa, e na te fia iloa pe faapefea ona ia fesoasoani i maʻi a Molimau a Ieova.

 Na mafai ona talanoa Bryn i le pule lua. Talu ai e leʻi mafai ona asiasi nisi i le falemaʻi, na talosaga ai Bryn pe mafai ona tuu lana numera i maʻi Molimau a Ieova ina ia latou talanoa ai. Na talia lana talosaga.

 Peitaʻi na mafaufau Bryn i le ʻaufaigaluega a le falemaʻi. Na faailoa atu e Bryn i le pule lua lona talisapaia o galuega o loo faia e le ʻaufaigaluega o le falemaʻi, ma lona faanaunauga o loo latou maua pea le soifua mālōlōina lelei. Na taʻu atu foʻi e Bryn na faitau i le tele o tagata o loo feagai ma mafatiaga ona o le faamaʻi, aemaise lava i ē o loo galulue i falemaʻi.

 Na ioe le pule lua ua matuā mafatia le ʻaufaigaluega a le falemaʻi ona o le KOVITI-19.

 Na faapea atu Bryn: “O loo iai i le matou upega tafaʻilagi ni faamatalaga e fesoasoani i tagata e feagai ai ma mafatiaga. Pe a e alu i le jw.org ona tā lea o le upu ʻmafatiaga’ i le vaega Suʻe, o le a e maua ai ni mataupu faalaeiau mo lau ʻaufaigaluega.”

 A o la talanoa na asiasi le pule lua i le tatou upega tafaʻilagi ma tā i totonu le upu “mafatiaga” i le vaega Suʻe, ma na ia maua ai le tele o mataupu. Na ia faapea mai: “Oka! O lea o le a ou faailoaina i la matou pule. E matuā aogā lava i le matou ʻaufaigaluega ma isi. O le a ou lolomiina ni kopi ma tufatufa atu i ai.”

 I ni nai vaiaso mulimuli ane ai, na talanoa ai Bryn ma le pule. Na taʻua e le pule na ō i le upega tafaʻilagi ma lolomi mai ai kopi o mataupu e faatatau i mafatiaga ma isi mataupu e fesootaʻi i ai. Na latou tufaina atu na kopi i tausi maʻi ma isi ʻaufaigaluega o le falemaʻi.

 Na faapea mai Bryn: “Na faafetai mai le pule mo la tatou galuega ma mataupu ua tusia lelei. Na matuā fesoasoani lava iā i latou.”