Na maua e Danielle, o se tasi o Molimau a Ieova i Aferika i Saute, se ato a se tagata na galo i totonu o se fale kofe. Na maua i totonu o le ato se ato tupe o loo iai se tupe ma ni credit card. Na naunau Danielle e toe faafoʻi le ato a le tagata, ae na fiu e suʻe se tuatusi po o se numera telefoni e maua ai, ae e na o le igoa o se tamāloa na iai. Na taumafai e faafesootaʻi le tamāloa e ala i le faletupe o loo iai lana teugātupe, ae e leʻi maua ai. Peitaʻi, e leʻi fiu ai o ia. Na ia viliina le numera a se fomaʻi na iai i se lisiti na maua i le ato. Na tali mai le tali telefoni ma ia faapea mai e mafai ona ia avatu le numera a Danielle i le tamāloa.

 Na faateʻia le tamāloa ina ua vili atu se tasi mai i le ofisa a le fomaʻi ma taʻu atu na maua e Danielle lana ato, ma o loo manaʻo e toe faafoʻi atu. Ina ua alu e aumai lana ato, na feiloaʻi ai ma Danielle ma lona tamā. Na la faaaogā lenā avanoa e faamatala atu ai iā te ia le māfuaaga na faia ai le tele o taumafaiga e suʻe o ia. Na la faailoa atu o i laʻua o ni Molimau a Ieova, ma e taumafai e ola e ōgatusa ma mataupu silisili o le Tusi Paia. O le māfuaaga lenā e la te taumafai ai e faamaoni i taimi uma.—Eperu 13:18.

 I ni nai itula mulimuli ane, na lafo atu ai e le tamāloa se feʻau tusitusia iā Danielle ma lona tamā, e toe faafetai atu ai mo le faafoʻi atu o lana ato. Na ia faapea atu: “Ou te matuā talisapaia lua taumafaiga e suʻe aʻu. Ou te fiafia ona na maua le avanoa e feiloaʻi ai ma oulua ma lo outou aiga, ma e lē galo lua uiga agalelei ma tausaafia. Ou te manaʻo e avatu se meaalofa mo oulua e faaali atu ai loʻu lotofaafetai. Ou te iloa e tele taumafaiga o loo oulua faia auā le galuega ua valaauina ai oulua e le Atua. O lua gaoioiga ua ou iloa ai o oulua o ni tagata maufaatuatuaina, e pei ona faaalia i le faamaoni o Danielle. Ia faamanuia le Atua i le lua galuega.”

 I ni nai masina mulimuli ane, na toe talanoa ai le tamā o Danielle ma le tamāloa. Na taʻua e le tamāloa e leʻi leva talu ai nei na ia maua ai se ato tupe a o faia lana faatau. Ina ua ia maua le fafine e ana le ato tupe ma toe faafoʻi i ai, na ia faamatala atu na ia faia faapea ona na iai se tagata faamaoni na toe faafoʻiina atu lana ato ina ua leiloa. Na faapea mai le tamāloa: “O se gaoioiga itiiti o le faamaoni ma le agalelei, e mafai ona uunaʻia ai isi e faia faapea, ma maua ai e tagata uma se olaga fiafia.”